அரசு ஊழியர்களுக்கு 8-ஆவது ஊதியக் குழு

மத்திய அமைச்சரவை ஒப்புதல்

- 

மத்திய அரசு ஊழியர்களின் ஊதியம், ஓய்வூதிய தாரர்களுக்கான படிகளை மாற்றியமைப்பதற்காக எட்டாவது ஊதியக் குழு அமைக்க மத்திய அரசு தீர்மானித்துள்ளது.

பிரதமர் நரேந்திர மோடி தலைமையில் தில்லியில் வியாழக்கிழமை நடைபெற்ற மத்திய அமைச்சரவைக் கூட்டத்தில் இதற்கான முடிவு எடுக்கப்பட்டது.

இதன் மூலம் தற்போது பணியாற்றி வரும் 49 லட்சத்துக்கும் அதிகமான மத்திய அரசு ஊழியர்களும், 65 லட்சம் ஓய்வூதியதாரர்களும் பயன்பெறுவர்.

ஏழாவது ஊதியக் குழு கடந்த 2016-ஆம் ஆண்டு அமைக்கப்பட்டது. அதன் பதவிக் காலம் வரும் 2026-இல் முடிவடைய உள்ள நிலையில், இந்த முடிவை மத்திய அரசு மேற்கொண்டுள்ளது.

இதுகுறித்து மத்திய செய்தி ஒலிபரப்புத் துறை அமைச்சர் அஸ்வினி வைஷ்ணவ் கூறியதாவது: மத்திய அரசு ஊழியர்களுக்கான எட்டாவது ஊதியக் குழுவை அமைக்க பிரதமர் நரேந்திர மோடி ஒப்புதல் அளித்துள்ளார். ஊதியக் குழுவின் தலைவர் மற்றும் இரு உறுப்பினர்கள் விரைவில் நியமிக்கப்படுவர்.

ஏழாவது ஊதியக் குழுவின் பதவிக் காலம் நிறைவடைவதற்கு முன்பாகவே, மத்திய அரசு ஊழியர்களுக்கான ஊதியத்தை மாற்றி அமைப்பது தொடர்பான பரிந்துரைகள் புதிய ஊதியக் குழுவிடமிருந்து பெறப்படுவது உறுதி செய்யப்படும்.