மீனவர்களை வாழ விடுங்கள்

கடலுக்குள் மீன் பிடிக்க செல்லும் தமிழக மீனவர்களை எல்லை தாண்டி மீன் பிடிப்பதாக இலங்கை கடற்படை கைது செய்வது வாடிக்கையாகி வருகிறது. ராமேஸ்வரம் மீன் பிடி துறைமுகத்தில் இருந்து மீன் பிடி அனுமதிக்கான டோக்கன் பெற்று 466 விசைப்படகுகளில் நேற்று முன்தினம் மீன் பிடிக்கச் சென்றுள்ளனர். 8 மீனவர்களை இலங்கை கடற்படையினர் கைது செய்து மன்னார் நீதிமன்றத்தில் ஆஜர்படுத்தியுள்ளனர். அவர்களிடம் இருந்து படகுகளும் பறிமுதல் செய்யப்பட்டுள்ளன. இதையடுத்து ராமேஸ்வரம் மீனவர்கள் கொந்தளிப்பில் உள்ளனர்.

- 

கடலில் மீன் பிடிக்கச் செல்லும் தமிழக மீனவர்களுக்கு சமீபகாலமாக மீன்கள் கிடைப்பதே அரிதாக உள்ளது. மீன் பிடி தடைக்காலம், கச்சத்தீவு அந்தோணியார் கோயில் திருவிழா என உள்ளிட்ட சில நிகழ்வுகள் காரணமாக மீனவர்கள் கடலுக்குள் செல்ல தடை விதிக்கப்படுகிறது. மற்ற நாட்களிலும் மீனவர்கள் மீன் பிடிக்க ஆழ்கடலுக்குள் செல்ல வேண்டியதுள்ளது. அங்கும் தேவையான அளவு மீன்கள் கிடைக்காவிட்டால், அவர்கள் நஷ்டத்தோடு திரும்ப வேண்டியதுள்ளது. இந்நிலையில் இலங்கை கடற்படை அடிக்கடி ரோந்து மேற்கொள்கிறோம் என்ற போர்வையில், தமிழக மீனவர்களை கைது செய்வதையே வேலையாக கொண்டுள்ளது. மீனவர்களை சிறைபிடிப்பதோடு, அவர்களின் வாழ்வாதாரத்தை சிதைக்கும் வகையில், லட்சக்கணக்கான மதிப்பு கொண்ட விசைப்படகுகளையும் பறிமுதல் செய்து கொள்கின்றனர்.