வாவுபலி பொருட்காட்சி ஏலம் நகராட்சி கூட்டத்தில் உறுதி செய்யப்பட்டது

குழித்துறை 100 வது வாவுபலி பொருட்காட்சி ஏலம் ரூ. 1கோடியே 77 லட்சத்து 7 ஆயிரத்துக்கு குழித்துறை நகராட்சி கவுன்சில் கூட்டத்தில் உறுதி செய்யப்பட்டது.

- 

குழித்துறை நகராட்சி கவுன்சில் கூட்டம் சேர்மன் பொன் ஆசை தம்பி தலைமையில் நடந்தது. ஆணையாளர் ராஜேஸ்வரன், ஓவர்சியர் விஜயராஜ், மேனேஜர் ஸ்டீபன், சுகாதார அதிகாரி ராஜேஷ், கவுன்சிலர்கள் சர்தார் ஷா, ரத்தினமணி, ஆட்லின் கெனில், அருள், விஜீ, ஜெயந்தி, மினி குமாரி, லில்லி புஷ்பம், விஜயலட் சுமி, ஜூலியட் மெர்லின் ரூத், லலிதா, ஸ்டாலின் சுஜா, ஜெயின் சாந்தி, ரோஸ்லெட் ஆகியோர் கலந்து கொண்டனர்.

கூட்டத்தில் குழித்துறை தாமிரபரணி ஆற்றில் தவறி விழுந்து உயிருக்கு போராடிய இரு சிறுவர்களை காப்பாற்ற உயிர் நீத்த பீட்டர் மறைவுக்கு ஒரு நிமிடம் மவுன அஞ்சலி செலுத்தப்பட்டது. தொடர்ந்து கவுன்சில் கூட்டத்தில் நடந்த விவாதம் வருமாறு:

விஜு: குழித்துறை சப் பாத்தில் தவறி விழுந்து பல உயிர் பலி ஏற்பட்டுள்ளது. எனவே இதற்கு நிரந்தர தீர்வு காணும் விதத்தில் சப்பாத் வழியாக நடந்து செல்பவர்களுக்கு வசதியாக கம்பியால் கைப்பிடியோ அல்லது தவறி விழுந்தால் கீழ் பகுதிக்கு செல்லாமல் இருக்க ஒரு பக்கம் கான்கிரீட் தூண் அமைக்க வேண்டும். இதை பொதுப்பணித்துறை செய்வதாக தெரியவில்லை. எனவே நகராட்சி சார்பில் செய்ய வேண்டும்.