மக்களின் குறைகளை உடனடியாக தீர்க்க ஜூலை 15 புதிய திட்டம் தொடக்கம்

'உங்களுடன் ஸ்டாலின்' என்ற பெயரில் 10 ஆயிரம் சிறப்பு முகாம்கள் மகளிர் உரிமை தொகை பெற விடுபட்டவர்கள் விண்ணப்பிக்கலாம் மு.க.ஸ்டாலின் அறிவிப்பு

- 

ஜூலை 15 முதல் உங்களுடன் ஸ்டாலின் முகாம் நடைபெற உள்ளது. இதில், மகளிர் உரிமை தொகை திட்டத்தில் விடுபட்ட பெண்கள் விண்ணப்பிக்கலாம் என தஞ்சாவூரில் நடந்த விழாவில் முதல்வர் மு.க.ஸ்டாலின் தெரிவித்தார்.

தமிழ்நாடு முதல்வர் மு.க. ஸ்டாலின் தஞ்சை மாவட்டத்துக்கு இரண்டு நாள் சுற்றுப்பயணமாக நேற்று முன்தினம் சென்னையில் இருந்து விமானம் மூலம் திருச்சி வந்தார். பின்னர் மாலையில் கல்லணைக்கு சென்று டெல்டா பாசனத்துக்காக கல்லணையிலிருந்து காவிரி, வெண்ணாறு, கல்லணை கால்வாய் மற்றும் கொள்ளிடம் ஆறுகளில் தண்ணீரை முதல்வர் மு.க.ஸ்டாலின் திறந்து விட்டார்.

இதைத் தொடர்ந்து நேற்று காலை 9.20 மணியளவில் தஞ்சை சுற்றுலா மாளிகையிலிருந்து காரில் புறப்பட்ட முதல்வர் மு.க.ஸ்டாலின் புதிய பேருந்து நிலையம் அருகே உள்ள திருமண மண்டபத்தில் நடந்த திருவையாறு எம்எல்ஏ துரை. சந்திரசேகரன் தம்பி மகள் திருமண விழாவில் பங்கேற்று மணமக்களை வாழ்த்தினார்.

பின்னர், அங்கிருந்து புறப்பட்ட முதல்வர், தஞ்சை மன்னர் சரபோஜி அரசு கல்லூரி வளாகத்தில் நடந்த அரசு நலத்திட்ட உதவிகள் வழங்கும் விழாவில் கலந்து கொண்டார். இதில் 2.25 லட்சம் பயனாளிகளுக்கு ரூ.558 கோடியில் பல்வேறு நலத்திட்ட உதவிகள் வழங்கும் பணியை துவக்கி வைத்து, 26 பேருக்கு நலத்திட்ட உதவிகளை வழங்கினார்.

மேலும், ரூ.1,194 கோடியில் புதிய பணிகளுக்கு அடிக்கல் நாட்டியதுடன், முடிவுற்ற திட்டப் பணிகளையும் முதல்வர் திறந்து வைத்தார். பின்னர் தஞ்சை, திருவாரூர், நாகை, மயிலாடுதுறை மாவட்டங்களுக்கு 100 மினி பஸ்களின் இயக்கத்தை கொடியசைத்து தொடங்கி வைத்தார்.

அப்போது முதல்வர் மு.க. ஸ்டாலின் பேசியதாவது:

2021-இல் நான் முதலமைச்சரான பிறகு, டிசம்பர் மாதம் தஞ்சை பகுதிக்கு நான் வந்தபோது சரஸ்வதி மகாலை பார்வையிட்டு ஆய்வு செய்தேன். அதன் பிறகு வரலாற்றுச் சிறப்பு வாய்ந்த சரஸ்வதி மகால் நூலகத்தில் பணியாற்றும் ஊழியர்களின் ஊதியத்திற்காக தமிழ்நாடு அரசு ஆண்டுதோறும் 75 லட்சம் ரூபாய் மானியமாக வழங்க ஆரம்பித்தோம்.