உலக சட்டாம்பிள்ளையாக மாற நினைக்கும் அமெரிக்கா...

ரம்பின் தலைமையில் அமெரிக்கா உலக சட்டாம்பிள்ளையாக மாற முயன்று கொண்டிருக்கிறது. பிற நாடுகளின் வர்த்தகத்திலும் யுத்தத்திலும் தனது மூக்கை நுழைத்து 'பெரியண்ணா' தோரணையில் செயல்படுகிறது.

- 

பாலஸ்தீன இஸ்ரேல் யுத்தம், ரஷ்யா - உக்ரேன் யுத்தம் போன்றவை பிறரால் தூண்டிவிடப்பட்டவையாகவே இருக்கின்றன. கடந்த பிப்ரவரியில் கூட அமெரிக்க ஜனாதிபதி டொனால்ட் ட்ரம்ப், அமெரிக்கா காஸா பகுதியை கையகப்படுத்தும் என்றும், எஞ்சியுள்ள கட்டிடங்களை தரைமட்டமாக்கி சமப்படுத்தும் என்றும், பாலஸ்தீன மக்களை இதர நாடுகளுக்கு மாற்றும் என்றும் அறிவித்தார்.

கடந்த காலங்களில் ரஷ்யா, அமெரிக்கா என இருநாடுகள் வல்லரசுகளாக இருந்துகொண்டு பிற நாடுகளின் விவகாரங்களில் பஞ்சாயத்து பேசின. தற்போது அமெரிக்காவும் சீனாவும் வல்லரசு தோற்றத்தில் பிற நாடுகளின் பிரச்சினையில் மூக்கை நுழைக்கின்றன.

கடந்த 2022ஆம் ஆண்டு பிப்ரவரி 24ஆம் தேதி தொடங்கி முடிவில்லாமல் நீடித்து வரும் ரஷ்யா - உக்ரேன் போரில் உக்ரேனுக்கு அமெரிக்கா, இங்கிலாந்து உள்ளிட்ட மேற்கத்திய நாடுகள் நிதியும் ஆயுத உதவியும் அளித்து வருகின்றன. இதில் ஜோ பைடன் தலைமையில் அமெரிக்கா இதுவரை 5.45 லட்சம் கோடி ரூபாய்க்கும் அதிகமான ராணுவ உதவிகளை உக்ரேனுக்கு அளித்துள்ளது. ஆனாலும் அதன் நோக்கம் வியாபாரம் என்பது விரைவிலேயே வெளிப்பட்டது. யுத்தம் முடிவுக்கு வரும் முன்பே செய்த உதவிக்கு பிராயசித்தம் தேட முயன்றது.

உக்ரேன் மண்ணில் அரிய கனிமங்களின் வைப்பு உள்ளது. அவற்றுள் லித்தியம், டைட்டானியம், சிர்கோனியம் மற்றும் கிராஃபைட் போன்றவை நவீன தொழில்துறைக்கு இன்றியமையாதவை. தான் வழங்கிய ஆயுதங்களுக்கு ஈடாக அவற்றை பயன்படுத்திக்கொள்ள உக்ரேன் ஆட்சியாளர்களை அமெரிக்கா நிர்பந்தித்தது. பல கட்ட பேச்சு வார்த்தைகளுக்கு பிறகு உக்ரைன் நாட்டில் இருக்கும் கனிம வளங்களை அமெரிக்கா பயன்படுத்திக் கொள்வது என வரலாற்று முக்கியத்துவம் வாய்ந்த ஒப்பந்தமும் கையெழுத்தானது.