Prentis Weldio o Hwlffordd yn barod i ddisgleirio yn EuroSkills

Yn Nenmarc ym mis Medi eleni, mae Tîm y DU yn cynnwys 19 o gystadleuwyr o bob cwr o'r DU, gyda Chymru yn ffurfio 37% trawiadol o'r tîm. Mae eu cyfranogiad yn dangos ymrwymiad Cymru i ragoriaeth mewn sgiliau galwedigaethol ac yn tanlinellu gallu’r genedl i gystadlu ar y lefel uchaf ar lwyfan Ewrop.

- 

Ar hyn o bryd yn brentis yn Haven Engineering ac yn fyfyriwr yng Ngholeg Sir Benfro, dechreuodd Luke Roberts ei daith gystadlu gyda Chystadleuaeth Sgiliau Cymru, lle enillodd fedal arian yn y gystadleuaeth Weldio.

Denodd ei dalentau sylw, ac yn fuan wedi hynny symudodd ymlaen i Rowndiau Terfynol Cenedlaethol WorldSkills y DU ym Manceinion, gan ennill teitl Canmoliaeth Uchel a denu sylw hyfforddwyr cenedlaethol.

Yn dilyn rownd ddwys o brofion pwysau lle sgoriwyd ymgeiswyr nid yn unig ar eu sgiliau weldio, ond hefyd ar dechneg, amser a gorffeniad, dewiswyd Luke yn swyddogol ar gyfer EuroSkills.

Dywedodd Luke: “Roedd yn benderfyniad mor dynn rhyngof fi a weldiwr talentog arall i fynd i EuroSkills. Roedden ni mor agos o ran sgil, ond ges i sgôr ychydig yn uwch ar y prawf pwysau.

“Roeddwn i wrth fy modd pan glywais fy mod i’n mynd i Ddenmarc. Dyma fydd y tro cyntaf i mi fod ar awyren, ac rwy’n cael mynd gyda fy rheolwr hyfforddi, Carl. Mae’n anhygoel y lleoedd rydych chi’n cael teithio iddyn nhw gyda chystadlaethau sgiliau. Os byddaf yn ddigon ffodus i gymhwyso ar gyfer cystadlaethau WorldSkills Rhyngwladol, byddaf yn cael mynd i Shanghai!”