Mas maayo magpabilin ang pay toilets sa terminal apan ayohon pud ang public CR

In fairness sa mga pay toilets o kanang kasilyas sa Cebu South Bus Terminal nga gipadagan ug gidumala sa usa ka pribadong kompaniya, maayo gyud alang niadtong maka-afford sa pagbayad niini apan kalbaryo niadtong igo-igo ra gyud ang budget.

- 

Bisan akong gisulod ang naasoy'ng pay toilet ilabi na ang ilang premium segment nga gikatakdang ablihan sa sunod semana, personally nakadayeg ko sa kalimpyo ug kagamitan nga pulos high end, humot, airconditioned ug murag naa ka lounge sa usa ka hotel kay naay music aron dili madungot ugaling maglain ang tiyan sa malibang.

Baligtad kaayo ang sitwasyon itandi sa public comfort room nga nangawagtang na ang mga urinals, ang mga bowl manomano pa nga buboan og kabo. Gani ang mga janitor pa ang mobubo ugaling dunay mogamit. Sa miaging administrasyon dili gyud kuno magamit ang mga public CR kay barado maong gibutangan og out of order. Naay CR didto sa second floor sa Sugbo Sentro apan ang sink ra ang nahabilin, wala na ang bowl ug ang urinals.