યુદ્ધ ભલે ન થયું...અમે સજ્જ હતા!

ઑપરેશન સિંદૂર વખતે આપણી સેનાની મદદે ખડે પગે ઊભા રહેલા પાક સરહદ પરનાં દેશનાં કુલ ૪૭ ગામના સરપંચને સરકારે સ્વાતંત્ર્ય દિનની ઉજવણી નિમિત્તે ખાસ દિલ્હી આમંત્ર્યા હતા. સૈન્ય અને સમાજ વચ્ચે સંવાદિતા વધારવા સાથે ‘સરપંચ સમ્માન’નો આ અનોખો પ્રયાસ જાણવા જેવો છે.v

- મહેશ શાહ (અમદાવાદ)

વાત થોડાં સપ્તાહ પહેલાંની છે. તારીખ સાથે કહેવું હોય તો, ૧૩ ઓગસ્ટની છે આ વાત. બનાસકાંઠા જિલ્લાના સૂઈ તાલુકાના જલોયા ગામના સરપંચ થાનાજી ડોડિયાના ઘર પાસે બોર્ડર સિક્યોરિટી ફોર્સ (બીએસએફ)ની જીપ આવીને ઊભી રહી. થાનાજી અને એમનાં પત્ની તથા દીકરા જીપમાં ગોઠવાયાં. એ જોઈને પડોશીઓ ટોળે વળ્યા. ઘણાને નવાઈ ઊપજી. થોડી વારમાં તો જીપ સાંકડા ધૂળિયા રસ્તા પરથી ઝડપથી નીકળી ગઈ. કંઈક એવું જ કચ્છ અને પાટણ જિલ્લાના સરપંચ સાથે પણ થયું. આવું પ્રથમ વાર બન્યું.

સરપંચને પરિવાર સહિત બીએસએફ ટીમ ક્યાં લઈ ગઈ? અને શા માટે?

જવાબ છે: આ ત્રણેય સરપંચને સપરિવાર વિમાન દ્વારા દિલ્હી મોકલવામાં આવ્યા. કારણ એ કે સરપંચ અને એમના ગામવાસીઓએ ગયા મે મહિના દરમિયાન ઑપરેશન સિંદૂર સમયે સીમા સુરક્ષાદળના જવાનોને મદદ કરી હતી અને સીમારક્ષા માટે સહયોગ આપ્યો હતો. એની કદર રૂપે કેન્દ્ર સરકારે વાઈબ્રન્ટ વિલેજ પ્રોગ્રામ અંતર્ગત ૧૫ ઓગસ્ટે દિલ્હીમાં વડા પ્રધાનના હસ્તે યોજાયેલા ધ્વજવંદન કાર્યક્રમમાં ઉપસ્થિત રહેવા દેશનાં ૪૭ સરહદી ગામના સરપંચોને સપરિવાર વિશેષ આમંત્રણ આપ્યું હતું. એ નિમિત્તે સૌએ ચાર દિવસની વીઆઈપી મહેમાનગતિ માણી. એ દરમિયાન સરપંચોએ કેન્દ્રીય મંત્રી જયુઅલ ઓરામ સાથે સૌજન્ય મુલાકાત કરી. એમાં વાઈબ્રન્ટ વિલેજ પ્રોગ્રામ દ્વારા સરહદી ગામોના સર્વાંગી વિકાસ માટે રસ્તા, વીજળી, પાણી, આરોગ્ય, શિક્ષણ અને ડિજિટલ કનેક્ટિવિટી, વગેરે સુવિધાની જાણકારી અપાઈ તથા ગ્રામવિકાસની ચર્ચા થઈ.

આ ૪૭ સરપંચમાં ગુજરાતના ત્રણ સરપંચ હતાઃ બનાસકાંઠાના જલોયાના થાનાજી ડોડિયા, પાટણના જાઝમ ગામના ભગવાનસિંહ જાડેજા અને કચ્છના બાલાસરનાં જમણીબહેન ચૌહાણ.

આવો, પહેલાં જાણીએ ઑપરેશન સિંદૂર સમયે સીમાની સુરક્ષા માટે ગુજરાતનાં સરહદી ગામોના સરપંચ અને સમાજની સજ્જતા અને સહયોગની વાત...

ભારત અને પાકિસ્તાનની સરહદથી વીસેક કિલોમીટર દૂર આવેલા બનાસકાંઠા જિલ્લાના જલોયાની વસતિ અંદાજે અઢી હજાર. બહુધા રાજપૂત, ઠાકોર અને રબારી પરિવાર ખેતી અને મજૂરી કરીને ગુજરાન ચલાવે. જલોયા સુધી કોઈ નહેરનું પાણી પહોંચતું નથી એટલે અહીંના લોકો વરસાદ આધારિત ખેતીમાં એરંડો, બાજરી, જુવાર અને ગુવારનો પાક લે. જલોયાને ૧૩ કિલોમીટર દૂર આવેલા નડાબેટ ગામ સાથે ગ્રુપ પંચાયત મળી છે.