સંબંધોની નવી વ્યાખ્યા લખે છે આ માનુની...

કૉલેજ પૂર્ણ કરતાં ૨૧ વર્ષની ઉંમરે પિતાએ એનાં લગ્ન કરાવ્યાં. સંયુક્ત પરિવારમાં એણે દરેક જવાબદારી નિષ્ઠાપૂર્વક નિભાવી. દીકરાને ઉચ્ચ શિક્ષણ આપવાની એકમાત્ર એમની ઈચ્છા. એ દરમિયાન, કુટુંબીજનોનાં સંતાનોનાં લગ્ન નક્કી કરાવતાં કરાવતાં આ મહિલા ૪૨ વર્ષની ઉંમરે લાગણી નીતરતા વૈવાહિક સંબંધ દ્વારા બે પરિવારોને જોડે છે.

- હેતલ રાવ

લગ્ન એટલે માત્ર બે વ્યક્તિનું મિલન નહીં, પરંતુ બે પરિવારોનું, બે સંસ્કૃતિનું અને ક્યારેક તો બે અલગ દુનિયાનું મિલન. આજના સમયમાં જ્યારે સંબંધ ક્યારેક માત્ર ટેક્નોલૉજી આધારિત ઍપ્સ પૂરતા સીમિત થઈ ગયા છે ત્યારે અમદાવાદનાં એક મહિલા છે, જેમણે આ ક્ષેત્રમાં એક ચીલો ચાતર્યો છે. એ છે અનાર ગવારવાલા.

મૂળ સુરેન્દ્રનગરના પાટડીના વતની અને અમદાવાદમાં રહેતા બિઝનેસમૅન મહેન્દ્રભાઈ દેસાઈ અને ગીતાબહેન દેસાઈનાં ત્રણ સંતાનમાં એકમાત્ર દીકરી અનાર. બાળપણથી જ પિતા સાથે એનું ગાઢ બંધન. નાનપણમાં એ ઘણી વાર પિતાના ખભા પર માથું મૂકીને કહેતી કે પપ્પા, હું મોટી થઈને એવું કામ કરીશ કે જેમાં લોકોને મદદ મળે, સેવા થાય.

પિતા એની આંખોમાં ઝળહળતાં સપનાં જોઈને હંમેશાં સમજાવતાઃ ‘હા બેટા, કામ તો એ જ કરવું કે જેમાં બે પૈસા ભલે ઓછા મળે, પણ લોકોનાં દિલમાંથી આશીર્વાદ મળે.' આ શબ્દો એનો જીવનમંત્ર બની ગયા. અનારે આ વાતને હૃદયમાં ગાંઠ સમાન બાંધી લીધી. સમય વીત્યો, અનારે ગ્રેજ્યુએશન પૂર્ણ કર્યું.

દીકરીના જીવનના નવા અધ્યાયનો આરંભ કરવા પિતાએ એનાં લગ્ન અમદાવાદના જ ઉદ્યોગપતિ સમીર ગવારવાલા સાથે કરાવ્યાં તથા પ્રેમભરી વિદાય આપી. સંયુક્ત પરિવારની હૂંફાળી ગોદમાં અનારબહેન પોતાની જવાબદારી નિભાવતાં નિભાવતાં ક્યારે ચાલીસનો આંબો વટાવી ગયાં એ એમને ase ખુદને પણ ખબર ન પડી, જ્યારે દીકરો દેવિન ૧૨મું ધોરણ પૂરું કરી અમેરિકા અભ્યાસ માટે રવાના થયો ત્યારે એમને પોતાની અંદર દબાયેલા સપનાને સાકાર કરવાની પ્રેરણા મળી.

પહેલેથી જ સગાંસંબંધીઓનાં ઘરે લગ્નની વાત ચાલે ત્યારે પરિવાર એમને જ આગળ કરતા. એ દરેક સંબંધને એવી નિષ્ઠા અને પ્રેમથી જોડતાં જાણે પોતાના સંતાનનું ભવિષ્ય ઘડાતું હોય. એ કુશળતાને એમણે પોતાના જીવનનું ધ્યેય બનાવી દીધું. આ જ જુસ્સાએ ૨૦૧૫માં એમને અનાર ગવારવાલા વેડિંગ્સ (AGW)–બિસ્પોક મેટ્રિમોની શરૂ કરવા પ્રેર્યાં. અહીં એમણે મૅચમેકિંગને એક અનોખી કળામાં રૂપાંતરિત કરી, જ્યાં પ્રેમ અને પ્રામાણિકતા એકબીજા સાથે ગૂંથાય છે.