કામ કામ કામ... પરિવાર માટે સમય ક્યાં?

કુટુંબના આધાર વગર વિદેશમાં રહેતા યુવાનોએ ક્યાંક તો જીવનનું સંતુલન શોધવું રહ્યું.

- ડૉ. મિતાલી સમોવા

થોડા સમય પહેલાં જાણીતા ઉદ્યોગપતિ અને મોટિવેશનલ સ્પીકર નારાયણ મૂર્તિએ યુવાનોને વધારેમાં વધારે કામ કરી પ્રોડક્ટિવ બનવું જોઈએ એવું નિવેદન કર્યું હતું. ત્યાર બાદ અન્ય એક ઉદ્યોગપતિએ યુવાનોને રવિવારે પત્નીનું મોઢું જોઈને ઘરે બેસી રહેવાની જગ્યાએ કામ કરવા જવું જોઈએ એવી ટીખળ કરી હતી.

બન્ને નિવેદન વખતે દેશમાં યુવાનોનો રોષ ફાટી નીકળ્યો હતો અને એમાંથી ઘણાએ અલગ અલગ માધ્યમ દ્વારા પોતાની નારાજગી વ્યક્ત કરી હતી. કોઈકના મતે આ બન્ને નિવેદન તદ્દન અસંવેદનશીલ અને માણસની વ્યક્તિગત સ્થિતિ અને પસંદગીને નજરઅંદાજ કરીને એને ફક્ત મશીન બનાવી દેવાની ગેરવૃત્તિથી ભરપૂર ગણી શકાય. કોઈ પણ વ્યક્તિને સારી રીતે જીવન જીવવા માટે આદર્શ રીતે આઠ કલાક કામ, આઠ કલાકનો આરામ અને બાકીના આઠ કલાક પોતાના અને સામાજિક સંબંધ જાળવવા માટે મળવો જોઈએ તો જ એને સારું જીવન છે એવું કહી શકાય. બાકી તો વેઠ કહેવાય. પહેલાં જમીનદારો કરાવતા હતા, આજના જમાનામાં ઉદ્યોગપતિઓ કરાવે છે. અગાઉ માત્ર અભણ લોકો આવી વેઠ કરતા એવું બોલાતું, આજે ભણેલાગણેલા કરે છે.