AIને કારણે ઈન્કમ ટૅક્સ વિભાગની નજર થઈ છે ચકોર

શું તમને ખબર છે કે તમારી દરેક મોટી આવક અને મોટા ખર્ચ પર આવકવેરા વિભાગની નજર છે? હા, આ નજર તો કાયમ હોય છે, પણ હવે આવકવેરા વિભાગને સપોર્ટ કરવા માટે આજના ટેકયુગનું નવું નક્કોર અને નક્કર સાધન એટલે કે ‘એઆઈ” (આર્ટિફિશિયલ ઈન્ટેલિજન્સ) સજ્જ થઈ ગયું છે.

- જયેશ ચિતલિયા

જો તમે એમ માનતા હો કે તમારી મોટી આવક અને મોટા ખર્ચ વિશે આવકવેરા વિભાગ સાવ અજાણ છે અથવા એમને તમારી ચોક્કસ આવક કે ખર્ચની ખબર પડી શકશે નહીં તો એ તમારો ભ્રમ હોઈ શકે. આવકવેરા વિભાગે એની ટૅક્સ સ્ક્રુટિની ડેટા અને જોખમઆધારિત બનાવી નાખી છે. કરદાતાના આ વરસના ઈન્કમ ટૅક્સ રિટર્નને ગયા વરસના રિટર્નની સાથે સરખાવવાનું મજબૂત સાધન હવે આવકવેરા વિભાગ પાસે હાથવગું છે. જો કરદાતા એની વાસ્તવિક કરતાં ઓછી આવક બતાવે અથવા ખોટાં ડિડક્શન ક્લેમ કરે તો એને પકડી પાડતાં વાર નહીં લાગે.

ઈન્કમ ટૅક્સ વિભાગે ટૅક્સ ટેક્નોલૉજીની મદદથી કરચોરી પકડી પાડવાનો સ્કોપ વધારી દીધો છે. ખરેખર તો ઈન્કમ ટૅક્સ અધિકારીઓ હવે આર્ટિફિશિયલ ઈન્ટેલિજન્સ (એઆઈ)નો અને ડેટા ઍનાલિટિક્સનો મહત્તમ ઉપયોગ કરતાં થઈ ગયા છે, જેની મારફત ટૅક્સ કમ્પ્લાયન્સને અને કોઈ નોંધપાત્ર આવક તથા એના પર લાગુ થતા ટૅક્સના આંકડામાં ફરક હોય તો એને પકડી શકાય છે.

આઈટી વિભાગ સુધી માહિતી ક્યાં-ક્યાંથી પહોંચે?