વડીલો પ્રત્યે આટલી અસંવેદનશીલતા કેમ?

વૃદ્ધ માતા-પિતાનાં માન-મર્યાદા ચૂકી જવાના કિસ્સા બહુ વધી રહ્યા છે ત્યારે...

- ડૉ. મિતાલી સમોવા

મનુષ્ય બીજા જાનવર કરતાં પ્રગતિશીલ બની આજે સૃષ્ટિમાં સર્વેસર્વા બન્યો છે, એનું સૌથી મોટું કારણ એ છે કે હજારો વર્ષો પહેલાં કોઈ ને કોઈ પેઢીએ પોતાના જીવનના અનુભવો અને સમૃદ્ધિની મૂડી એનાં બાળકોને તૈયાર ભાણે પીરસવાનું શરૂ કર્યું હતું. આ કારણે પછી આખો માનવસમાજ ઉત્તરોત્તર પ્રગતિ કરતો રહ્યો.

ભિન્ન સંસ્કૃતિ ગણો કે બીજું કંઈ, પશ્ચિમી દેશો કરતાં ભારત સહિતના એશિયન દેશોમાં માતા-પિતાનું સમ્માન જાળવવાનો અને મૃત્યુ સમય સુધી બાળકો દ્વારા એમની કાળજી લેવાનો સામાજિક અને નૈતિક ધારો બન્યો. ભારતમાં સંયુક્ત કુટુંબ આપણે માનીએ એટલાં સામાન્ય હવે રહ્યાં નથી, છેલ્લા ફૅમિલી હેલ્થ સર્વે મુજબ હાલના તબક્કે શહેરોમાં તો ફક્ત ચાર ટકા પરિવાર સંયુક્ત કુટુંબ તરીકે સાથે રહે છે અને એને કારણે વડીલોની કાળજી બાબતે પ્રશ્નો ઊભા થાય છે.

હમણાં એક વિડિયો વાઈરલ થયો, જેમાં એક આધેડ યુવતી પોતાની માતાને પ્રૉપર્ટી પોતાના નામે કરવા માટે સખત માર મારતી દેખાય છે. એ જોઈને કળ વળે એ પહેલાં હરિયાણા હાઈ કોર્ટે એક ચુકાદો આપ્યો, જે હળાહળ કળિયુગમાં મા-બાપોની દુ:ખદ હાલત સમજાવવા માટે પૂરતો હતો. ઘટના કંઈક આવી હતીઃ