એ અવશેષો ખરેખર સોમનાથના છે?

એક હજાર વર્ષ પહેલાં મોહમ્મદ ગઝનીના આક્રમણ વખતે સોમનાથના લિંગના ભગ્નાવેષો લઈને તામિલનાડુ પહોંચેલા બ્રાહ્મણપરિવારના વંશજોએ આરસના બે ગોળાકાર ટુકડા શ્રી શ્રી રવિશંકરજીને સોંપ્યા. હવે એ અવશેષોની યાત્રા કાઢવાની તૈયારી થઈ રહી છે ત્યારે જાણીએ, ઈતિહાસ શું કહે છે.

- દેવેન્દ્ર જાની (રાજકોટ)

શ્રદ્ધાનો હો વિષય તો પુરાવાની શી જરૂર?

કુરાનમાં તો ક્યાંય પયગંબરની સહી નથી...

જલન માતરીનો આ શેર કોઈ પણ ધાર્મિક મુદ્દાની ચર્ચા વખતે કાને અથડાયા વગર રહેતો નથી. કોઈ મંદિર, ધર્મ કે સંપ્રદાયની વાત હોય ત્યારે દરેક ભાવિકની પોતાની લાગણી હોય છે, જે એનો સ્વતંત્ર અધિકાર છે. અલબત્ત, આવો કોઈ મુદ્દો કે વિવાદ ઈતિહાસ સાથે જોડાયેલો હોય ત્યારે વાત લોકોને ગળે ઉતારવા ઐતિહાસિક પ્રમાણોની આવશ્યકતા ઊભી થાય છે. આવું જ બન્યું છે પ્રથમ જ્યોતિર્લિંગ સોમનાથના શિવલિંગના કેટલાક ભગ્નાવેષ મળવાના મામલે.

પ્રયાગમાં મહાકુંભમેળો સંપન્ન થયો અને મહાશિવરાત્રિએ ભોલેનાથની પૂજા-અર્ચનાથી દેશભરમાં આસ્થાના માહોલ વચ્ચે દિલ્હીના પંજાબી બાગ ખાતે યોજાયેલા ભવ્ય સત્સંગમાં આર્ટ ઑફ લિવિંગના આધ્યાત્મિક ગુરુ શ્રી શ્રી રવિશંકરે લાખો ભક્તો સમક્ષ આરસ પથ્થરના શિવલિંગ આકારના બે ટુકડા દર્શનાર્થે મૂક્યા. એ વખતે એમણે દાવો કર્યો કે ભગવાન સોમનાથ જ્યોતિર્લિંગના આ અંશ છે. શ્રી શ્રી રવિશંકરે એમ પણ કહ્યું કે ઈસવી સન ૧૦૨૪માં મોહમ્મદ ગઝનીએ સોમનાથ મંદિર લૂંટ્યું ત્યારે ત્યાંનું લિંગ ખંડિત થયું હતું અને એના આ ટુકડા હજાર વર્ષ સુધી તામિલનાડુના કોઈ અગ્નિહોત્રી બ્રાહ્મણપરિવારે પેઢીઓથી છુપાવીસાચવીને રાખ્યા હતા. હવે પુરીના શંકરાચાર્યજીના કહેવાથી એ અંશો મારી પાસે લાવવામાં આવ્યા, જે આજે હું જાહેર દર્શનાર્થે મૂકી રહ્યો છું...