લેભાગુ ભૂવા-તાંત્રિક હજી કેટલાને ખુવાર કરશે?

ચમત્કાર અને પરચાની વાતો પ્રસરાવી પૈસા, પદ, પ્રતિષ્ઠા અપાવવાનો તથા અસાધ્ય બીમારીની સારવાર કરી આપવાનો દાવો કરતા તાંત્રિક અને ભૂવા ગુજરાતમાં વધતા જાય છે. આવી અંધશ્રદ્ધા ડામવા કાયદો છે, તેમ છતાંય લોકો એમની જાળમાં ફસાયા જ કરે છે. હદ તો એ છે કે હમણાં આવો એક ભૂવો અમદાવાદની હૉસ્પિટલમાં એક દરદીના ‘ઈલાજ’ માટે પહોંચી ગયો!

- મહેશ શાહ (અમદાવાદ)

ગુજરાતની સૌથી મોટી એવી અમદાવાદની સિવિલ હૉસ્પિટલ સમયાંતરે ચર્ચામાં રહે છે. હમણાં એના સુપરિન્ટેન્ડેન્ટે સિવિલ હૉસ્પિટલની બદનામી અંગે પોલીસને અરજી આપી. જાણીને આશ્ચર્ય થશે કે એ પાત્ર છે અમદાવાદનો ભૂવો.

એના મૂળમાં છે આ ઘટનાઃ સોશિયલ મિડિયામાં વાઈરલ થયેલા એક વિડિયોમાં ટી-શર્ટ અને ચશ્માંધારી યુવાન ભૂવો મુકેશ માસ્ક પહેરીને સિવિલ હૉસ્પિટલના આઈસીયુ વૉર્ડમાં જાય છે. એમાં સારવાર લેતા દરદીના માથા પર હાથ ફેરવીને કોઈક મંત્ર બોલે છે. પછીના દશ્યમાં આ દરદીનો હોવાનો મનાતો પરિવાર પોતાને ડૉક્ટર ખોડિયાર તરીકે ઓળખાવતા મુકેશ ભૂવાનાં કંકુ-પગલાં પડાવીને અને આરતી ઉતારીને એનું સ્વાગત કરે છે.

સિવિલ હૉસ્પિટલના સુપરિન્ટેન્ડેન્ટ ડૉ. રાકેશ જોશી ચિત્રલેખાને કહે છે: ‘સિવિલ કૅમ્પસમાં ફોટો અને વિડિયોગ્રાફી પર પ્રતિબંધ છે, છતાંય ભૂવાએ કોઈક પાસેથી મુલાકાતી પાસ લઈને વૉર્ડમાં જઈને દરદી સાથેનો વિડિયો ઉતારીને વાઈરલ કર્યો. એનાથી હૉસ્પિટલની બદનામી થઈ. વળી, આ અંધશ્રદ્ધા ફેલાવવાની કોશિશ છે.'

પોલીસ ભૂવા સામે ક્યારે પગલાં લેશે એ ખબર નથી, પરંતુ હૉસ્પિટલમાં દરદીની કથિત સારવારવિધિ કરનાર ભૂવો ચર્ચામાં છે. ગુજરાતની આ પ્રકારની સંભવતઃ આ પ્રથમ ઘટના.

હવે તાંત્રિકના કારનામાની ગુજરાતમાં પ્રથમ વાર બનેલી ઔર એક ચોંકાવનારી ઘટના વાંચો. પખવાડિયા પહેલાં અમદાવાદના સરખેજ પોલીસસ્ટેશનના ઈન્સ્પેક્ટર આર.કે. ધોળિયાને અમદાવાદમાં જ રહેતા ડ્રાઈવર જિગર ગોહિલે પોતાના શેઠના કારનામાની ખાનગી બાતમી આપી, એના પગલે પોલીસે વઢવાણમાં રહેતા ત્રણ સંતાનના પિતા, નવેક ધોરણ ભણેલા, ૪૨ વર્ષના તાંત્રિક નવલસિંહ ચાવડાની ધરપકડ કરી. કારણ એ કે નવલસિંહે ચાંગોદરમાં કૉસ્મેટિકનો વેપાર કરતા અભિજિતસિંહ રાજપૂતને તાંત્રિકવિધિથી એક રૂપિયાના ચાર રૂપિયા (પૈસા ચાર ગણા) કરી આપવાની લાલચ આપી હતી. કહે છે કે એ પછી સોડિયમ નાઈટ્રેટ કોઈ પ્રવાહીમાં ભેળવીને અભિજિતને પિવડાવી દેવાનો નવલસિંહનો કારસો હતો. એની ઝેરી અસરથી અભિજિત મૃત્યુ પામ્યા પછી પૈસા લઈને ભાગી જવાનો એનો પ્લાન હતો. જો કે પોલીસે ત્વરિત પગલાં લઈને આરોપી તાંત્રિક નવલસિંહ ચાવડાની ધરપકડ કરીને અભિજિતનો જીવ બચાવ્યો. નવલની કારમાંથી સફેદ પાવડર અને સુસાઈડ નોટ મળી.