બનાવટી બાબુઓનો કેમ ફાટ્યો છે રાફડો?

પોલીસ અને બીજા સરકારી વિભાગના અધિકારી તરીકે ઓળખ આપી લોકો પાસેથી પૈસા પડાવવાના કે બીજી કોઈ છેતરપિંડી કરવાના કિસ્સા વધી રહ્યા છે. આવા કેટલાક લેભાગુઓએ તો વડા પ્રધાન કે મુખ્ય મંત્રી કાર્યાલયના ઑફિસર હોવાનો દાવો કરીને સુદ્ધાં લોકોને ઉલ્લુ બનાવ્યા છે.

- મહેશ શાહ (અમદાવાદ)

થોડા દિવસ પહેલાંની વાત છે. અમદાવાદ ઍરપોર્ટ પર બેઠી દડીનો દાઢી અને ચશ્માંધારી ત્રીસેક વર્ષી મેહુલ શાહ ઊતરે છે. ગેટ બહાર નીકળતાંવેત અમુક લોકો એના પર પુષ્પવર્ષા કરે છે. બાજુમાં બે બાઉન્સર ગોઠવાય છે. બાઉન્સર કારનો દરવાજો ખોલે છે અને સાહેબ લાલ લાઈટ અને સફેદ પડદાવાળી કારમાં બેસીને નીકળી જાય છે.

આ અધિકારીના વિઝિટિંગ કાર્ડ પર ત્રણ સિંહ મુખાકૃતિના પ્રતીક સાથે લખ્યું છેઃ મેહુલ પી. શાહ, ચૅરમૅન, સાયન્સ ઍન્ડ રિસર્ચ વિભાગ, કેન્દ્ર સરકાર. એના જ બીજા એક ઓળખપત્રમાં વળી લખ્યું છેઃ ડિરેક્ટર, મહેસૂલ વિભાગ, ગાંધીનગર સચિવાલય.

જો કે બાઉન્સર અને શુભેચ્છકોથી ઘેરાયેલા રહેતા શાહ હવે પોલીસ લૉકઅપમાં છે તથા છાશવારે સરકારી કારના બદલે પોલીસવૅનમાં બેસવું પડે છે.

કારણ? મેહુલ શાહ અમદાવાદ પોલીસની ક્રાઈમ બ્રાન્ચના ચોપડે આરોપી છે. એની સામે નકલી સાયન્ટિસ્ટ અને નકલી આઈએએસ અધિકારી તરીકે ઓળખ આપવાનો તથા એ માટેના નકલી દસ્તાવેજો બનાવવાનો, છેતરપિંડી કરવાનો આરોપ છે.

મૂળ સુરેન્દ્રનગરનો અને વર્ષોથી વાંકાનેરમાં સ્થાયી થયેલો મેહુલ ભાડાની જગામાં અંગ્રેજી માધ્યમની જ્યોતિ સ્કૂલ અને કિડ્સલૅન્ડ સ્કૂલ ચલાવે છે. એન્જિનિયરિંગનો અભ્યાસ કરનારા મેહુલને મોટી મોટી વાત કરીને સામેવાળાને પ્રભાવિત કરવાની આદત. એમાં વાંકાનેરના બે યુવકનો સાથ મળ્યો. સ્કૂલ સંચાલનના અનુભવથી એણે સુરેન્દ્રનગર, ધ્રાંગધ્રા અને પછી અમદાવાદમાં અમુક સ્કૂલ સંચાલકને મળીને મોટી રકમે ખરીદવા કે ભાડેથી સંચાલન કરવાની ઑફર આપી.

અમુક લોકોને એણે સાયન્સ ઍન્ડ ડેવલપમેન્ટના ડિરેક્ટર તરીકે ઓળખ આપીને નોકરી અપાવવાની લાલચ આપી. એ જ રીતે રેવન્યૂ વિભાગના આઈએએસ અધિકારી ગણાવીને અમદાવાદના ટ્રાવેલ સંચાલક પ્રીતેશ શાહ સાથે એણે છેતરપિંડી કરી, એ ભારે પડી. ક્રાઈમ બ્રાન્ચે ૨૪ નવેમ્બરે મેહુલ શાહની ધરપકડ કરી.

આ કેસના તપાસ અધિકારી, ક્રાઈમ બ્રાન્ચના ઈન્સ્પેક્ટર જે.કે. મકવાણા કહે છેઃ ‘આરોપી મેહુલ શાહે પ્રીતેશ શાહ પાસેથી સરકારી કામ માટે બે ગાડી અનુક્રમે દૈનિક ૩૫૦૦ અને સાત હજારના ભાડા પર મેળવીને અમુક રકમ ચૂકવી નહોતી. એણે કારમાં સાઈરન અને પડદા લગાવવા ગૃહ મંત્રાલયનો બનાવટી પત્ર આપ્યો હતો.’