મારા જિન્સ નઠારા

થાબડશે એ ખભો કે ખંજર હુલાવી દેશે આધાર છે બધોયે એના જનીન ઉપર

- હિમલ પંડ્યા

જનીન એટલે આનુવંશિક લાક્ષણિકતાઓના સંચારણ માટે સંકેતો ધરાવતો એકમ. અમારી જેમ તમને પણ જો આવી વ્યાખ્યા બહુ અઘરી લાગતી હોય તો હોઠે ચડેલો અંગ્રેજી શબ્દ જિન્સ સમજવામાં સરળ રહેશે.

જાતિ-પ્રજાતિની લાક્ષણિકતા આગામી પેઢીઓમાં વહેતી રહેતી હોય છે. જો શ્વાનની વાત કરીએ તો વફાદારી એના જિન્સમાં જ હોય છે. માલિક માટે એ જાન આપી દેતાં અચકાય નહીં. કાગડા હંમેશાં લુચ્ચા જ જોવા મળશે. સિંહ અને વાઘ જેવાં પ્રાણીઓમાં શિકારની ભાવના સહજ હોય છે. કાચબીનાં બચ્ચાં ઈંડાંમાંથી બહાર આવે એટલે એમને ખબર જ હોય કે એમણે દરિયા તરફ દોટ મૂકવાની છે. એમને કોઈ કહેવા કે શિખવાડવા નથી આવતું. એ સમજણ એમના જિન્સમાં જ હોય છે.