ઘર ફૂટે ઘર જાય...

દિલ્હી અને પંજાબની લોકસભા ચૂંટણી ટાણે જ આ બે રાજ્યમાં ભાજપને મજબૂત લડત આપી શકે એવી ‘આમ આદમી પાર્ટી’ના બે નેતા બાખડ્યા છે. અરવિંદ કેજરીવાલે મૌન તોડીને પણ ઘરની આગ પહેલાં ઠારવી પડશે.

- હીરેન મહેતા

આમ આદમી પાર્ટી (આપ) માટે ગ્રહણ ટાણે સાપ નીકળ્યો છે. અરવિંદ કેજરીવાલના પક્ષનું સૌથી વધુ ઊપજે છે એ દિલ્હી અને પંજાબમાં લોકસભાની ચૂંટણી હજી થવાની બાકી છે અને એ પહેલાં પક્ષના બે નેતા વચ્ચે ઘમસાણ મચ્યું છે. આમ આદમી પાર્ટીનાં આગેવાન સ્વાતિ માલિવાલને લગતો આ વિવાદ છે અને આ વિવાદને કારણે આપની સમગ્ર નેતાગીરી માટે ક્ષોભની સ્થિતિ ઊભી થઈ છે.

કેજરીવાલના જ અંગત સચિવ બિભવ કુમાર સામે માલિવાલે શારીરિક મારપીટનો આરોપ લના સત્તાવ મૂક્યો છે. માલિવાલ અને બિભવ કુમાર વચ્ચેની હાથાપાઈની ઘટના કેજરીવાલના સત્તાવાર નિવાસસ્થાને બની છે. મામલો પોલીસસ્ટેશને પહોંચ્યો ત્યારે શરૂઆતમાં તો આપ વતી બિભવ કુમાર સામે પગલાં લેવાશે... એવું નિવેદન કરવામાં આવ્યું, પણ એક જ દિવસમાં બાજી ફરી ગઈ અને હવે આમ આદમી પાર્ટીના મોટા ભાગના નેતા બિભવ કુમારનો બચાવ કરવામાં લાગી પડ્યા છે. સ્વાતિ માલિવાલ ભાજપના ઈશારે કેજરીવાલને ભીડવવા બિભવ કુમાર સામે જંગે ચડ્યાં હોવાના પણ આક્ષેપ થઈ રહ્યા છે.

હકીકત તો આંખ સામે આવવાની હશે ત્યારે આવશે, અત્યારે તો આમ આદમી પાર્ટીએ ચૂંટણીમાં ભાજપ સામે લડવાની સાથે ઘરની અંદર લાગેલી આગ હોલવવાની છે.

બે વર્ષ અગાઉ દિલ્હીની આમ આદમી પાર્ટી (આપ)ની સરકારે શરાબના ઠેકા ફાળવવા માટે નવી નીતિ ઘડી હતી, પણ એની સામે ભારે વિરોધ થયો એટલે કેજરીવાલ સરકારે આ વિવાદાસ્પદ નીતિ પાછી ખેંચી. જો કે એમાં થયેલી કથિત ગેરરીતિના આરોપસર મુખ્ય પ્રધાન અરવિંદ કેજરીવાલે સુદ્ધાં જેલભેગા થવું પડ્યું. પક્ષના બે વરિષ્ઠ નેતા હજી જેલમાં છે. અલબત્ત, કેજરીવાલ લોકસભા ચૂંટણી માટેનું મતદાન પૂરું થાય ત્યાં સુધી બહાર રહેવાની રાહત સર્વોચ્ચ અદાલતમાંથી મેળવી શક્યા છે