એકની સંપત્તિ બીજાને...બ્રિટન-અમેરિકામાં શું છે સ્થિતિ?

સરખામણીનો આશય નથી, કરાય પણ નહીં... પરંતુ સંપત્તિની સમાન વહેંચણીની બીજા કેટલાક દેશોમાં કેવી જોગવાઈ છે એ જાણીએ...

- કેતન મિસ્ત્રી (મુંબઈ)

રાહુલ ગાંધીએ કોંગ્રેસના ઘોષણાપત્રમાં જે ને એક મુદ્દો છે એની, વેલ્થ રિડિસ્ટ્રિબ્યુશનની વાત કરી એ શું છે એ તો વાચકોએ આ આવરણકથામાં વાંચ્યું. ધનકુબેરોના પૈસા ગરીબો કે જરૂરતમંદોને વહેંચવાના કોંગ્રેસના વાયદા તો એ સત્તા પર આવે અને આવીને વાયદા પૂરા કરે ત્યારે વાત, પણ સંપત્તિના પુનઃ વિતરણની વિદેશોમાં, ખાસ કરીને અમેરિકા, કેનેડા તથા યુરોપના દેશોમાં શું સ્થિતિ છે? શું વેલ્થ રિડિસ્ટ્રિબ્યુશન ખરેખર શક્ય છે ખરું? શું એવો કોઈ કાયદો ખરો, જેના હેઠળ કોઈની સંપત્તિ કોઈને વહેંચવાનો અધિકાર સરકારને આપે છે? 

અમેરિકાની વાત કરીએ તો, અહીં બેકારી ભથ્થાં, વડીલોને જાતજાતની સગવડ, મફત મેડિકલ તથા પ્રાથમિક-માધ્યમિક મફત શિક્ષણ જેવી સગવડ મળે છે. છેલ્લા પાંચ દાયકા કરતાં વધુ સમયથી અમેરિકાને કર્મભૂમિ બનાવનારા તથા અમેરિકાની રાજધાની વૉશિંગ્ટનના ટૅક્સ કમિશનર તથા ચીફ ફાઈનાન્સિયલ ઑફિસર રહી ચૂકેલા નટવર ગાંધી કહે છેઃ ‘અમેરિકાના બજેટના ૬૦-૬૫ ટકા તો પ્રજાકલ્યાણમાં જ ખર્ચાઈ જાય છે.

નટવરભાઈ ઉમેરે છે કે તમે એ વિચારો કે નોકરી દરમિયાન સોશિયલ સિક્યોરિટી હેઠળ અમે કપાવેલા પૈસા નિવૃત્તિ બાદ અમને મળે છે, પણ અમે જેટલા પૈસા કપાવ્યા એના કરતાં અનેક ગણા વધારે મેળવતા રહીએ છીએ ને દર વર્ષે આ રકમ વધતી જ જાય છે, કારણ કે ફુગાવો વધે છે.

બીજી મહત્ત્વની વાત એ કે જેમણે કોઈ જ ટૅક્સ, સોશિયલ સિક્યોરિટીમાં પૈસા કપાવ્યા નથી કે અર્થતંત્રમાં જેમનો કોઈ જ ફાળો નથી એવા દેશમાંથી આવેલા વડીલોને (ઈમિગ્રન્ટ્સને) પણ સરકાર નિયમિત પૈસા આપે છે. ત્યાંના ગુજરાતીઓ મશ્કરીમાં એને ઘસારા ફંડ કહે છે.