ભાજપઃ લક્ષ્ય નજર સામે છે, પણ...

શાસક પક્ષના પ્રચંડ જનસમર્થનના વરતારા સામે છેલ્લે સુધી પોતાનું મન ન બનાવી શકનારા મતદારો પરિણામની બાજી ફેરવી શકે ખરા?

- હીરેન મહેતા

૧૯એપ્રિલે પહેલો મત પડશે અને ચોથી ૧૯ જૂને એકસાથે લોકસભાની તમામ બેઠકોની મતગણતરી પછી પરિણામ જાહેર થશે એ વચ્ચેનો ગાળો સ્કૂલ-કૉલેજનાં વૅકેશન જેટલો, ખાસ્સો લાંબો છે. સ્કૂલ-કૉલેજના વિદ્યાર્થીઓનું ભલે વૅકેશન હોય, આ ગાળામાં ચૂંટણી માટેના ઉમેદવારોની પરીક્ષા થવાની છે. ૯૬ કરોડથી વધુ મતદારો ૫૪૩ બેઠક માટેના ઉમેદવારો પર એમની પસંદગીનું મતું મારશે.

અત્યારે પ્રચાર સાથે દેશભરમાં મતદાર જાગૃતિના કાર્યક્રમ ચાલે છે.

ચૂંટણી પહેલાંનાં ઘણાંખરાં અનુમાન વધુ એક વખત ભાજપ સરકારની શક્યતા બાંધે છે. વિપક્ષો આ હવા સામે એક થવા ઈચ્છે છે, પણ એમના જ કેટલાક આગેવાનોની મહત્ત્વાકાંક્ષા વચ્ચે આવે છે. બંગાળમાં મમતા બેનરજીએ અને પંજાબમાં આમ આદમી પાર્ટીએ નોખો ચોકો કરી જ ઊ નાખ્યો છે. મહારાષ્ટ્રમાં ઉદ્ધવ ઠાકરે પ્રણિત શિવસેનાએ એના ઉમેદવારોનાં નામ જાહેર કરી કોંગ્રેસનો અણગમો વહોરી લીધો છે, કારણ કે ભાજપવિરોધી મહાવિકાસ આઘાડીની બેઠક-વિતરણ ફૉર્મ્યુલા હજી નક્કી થઈ નથી. કોંગ્રેસ હવે એટલી ઘસાઈ ગઈ છે કે મોટા ભાગનાં રાજ્યોમાં એકલપંડે ચૂંટણી લડવાની એની ત્રેવડ નથી. દેશનાં લગભગ બધાં રાજ્યોમાં એનું ભાંગ્યુંતૂટ્યુંય સંગઠન માળખું તો છે જ, પણ એ માળખું એની બેઠકનો સરવાળો ત્રણ આંકડા સુધી લઈ જઈ શકે એટલું સમર્થ નથી.