ખોળાનો ખૂંદનાર નથી એ ખામી કોની?

પ્રિમેચ્યૉર ઓવેરિયન ફેલ્યૉરથી હૃદયની કામગીરીને પણ થઈ શકે છે અસર

- ડૉ. અર્ચના પારસ શાહ

ચાલો સખીગણ, તમારી ગાયનેક ફ્રેન્ડ ફરી હાજર છે તમને મૂંઝવતા  કેટલાક સવાલના જવાબ સાથે...

પ્રશ્નઃ મારી પુત્રવધૂને ૩૫-૩૬ વર્ષની ઉંમરથી માસિકસ્રાવ આવતો બંધ થઈ ગયો છે. એને પણ હવે બે વર્ષ થઈ ગયાં. આવું થઈ શકે? થાય તો શું કારણ હોઈ શકે? અને હવે ફરી માસિક શરૂ થવાની શક્યતા હોય?

ગાયનેક ફ્રેન્ડઃ કોઈ પણ સ્ત્રીને ૪૦ વર્ષ પહેલાં જો માસિક બંધ થઈ જાય તો એને પ્રિમેચ્યૉર મેનોપોઝ કહેવામાં આવે છે. જો કે ચોક્કસ નિદાન માટે તમારે તમારાં પુત્રવધૂની ગાયનેક ડૉક્ટર પાસે તપાસ કરાવવી જોઈએ. સોનોગ્રાફી અને હોર્મોન્સની ટેસ્ટ દ્વારા પ્રિમેચ્યૉર મેનોપોઝની જાણ થઈ શકે છે. જો એમને પ્રિમેચ્યૉર મેનોપોઝ અથવા POF-Premature Ovarian Failure હોય તો હોર્મોન્સની ટેસ્ટ એટલે કે લોહીના રિપોર્ટથી ખબર પડે. આ સ્થિતિ પ્રમાણમાં વહેલી ઊભી થાય તો એસ્ટ્રોજન ઓછા થવાથી સ્ત્રીના શરીરમાં અમુક તકલીફ થઈ શકે છે. ખાસ તો હાડકાં અને હૃદયમાં તકલીફનું જોખમ વધી જાય. એસ્ટ્રોજન મૂળ તો એક પ્રકારના હોર્મોનનો સમૂહ છે, જે સ્ત્રીના જાતીય આવેગ અને પ્રજોત્પત્તિની પ્રક્રિયા સાથે સંકળાયેલા છે.