કૉલેજના પ્રોજેક્ટથી મળી કારકિર્દીની દિશા

લગ્નપ્રસંગની આમંત્રણપત્રિકા હવે મોટે ભાગે વ્હૉટ્સઍપ મેસેજના રૂપમાં જ મળતી હોય એવા દિવસોમાં પણ મર્યાદિત સંખ્યામાં કંકોતરી છપાવવાનું ચલણ જળવાઈ રહ્યું છે. આવી કુમકુમ પત્રિકામાં લાગણીની મીઠાશ ઉમેરવાનું કામ પણ હજી થઈ રહ્યું છે.

- નિતુલ ગજ્જર

જીન્મ-મરણથી માંડી જીવનમાં બનતી મોટા ભાગની ઘટનાની જાણ બીજાને કરવા માટે  આપણે ત્યાં વ્હૉટ્સઍપ મેસેજનું ચલણ બહુ જ વધી ગયું છે. એ વચ્ચે એવા લોકો પણ છે જે માને છે કે જે લગ્ન માટેની કંકોતરી યજમાન (ખાસ તો વર-કન્યાનાં માતા-પિતા) પોતે સગાંસંબંધી ને આપવા જાય એ લગ્નમાં મહેમાનો ઉમળકાભેર સામેલ થાય છે, પછી ભલે એ લગ્નપ્રસંગ કોઈ સામાન્ય માણસના ઘરે હોય.આમ જોવા જઈએ તો વાત સાવ સાચી છે, કારણ કે જે પ્રસંગમાં હૃદયથી આમંત્રણ મળ્યું હોય ત્યાં જવાનું સૌકોઈ પસંદ કરે જ. આખરે તો હાથોહાથ આપવામાં આવતી કંકોતરીમાં યજમાનનો ભાવ છલકતો હોય.

આજે લોકોમાં કંકોતરી આપવા જવાનો યુગ આથમતો જાય છે. એની જગ્યાએ મોટા ભાગના લોકો ડિજિટલ કંકોતરી તૈયાર કરી પીડીએફ્ના રૂપમાં આમંત્રણ મોકલી આપે છે અને પછી ફોન પર વાત કરી લે છે. જો કે શુકન ખાતર, ધર્મસ્થળમાં મૂકવા માટે તથા એકદમ નજીકનાં સગાંસંબંધીઓને આપવા માટે થોડી તો થોડી, કંકોતરી છપાવવાનું ચલણ છે ખરું. કંકોતરીમાં લગ્નપ્રસંગ વિશે માહિતી, સગાંસંબંધીઓનાં નામ અને શુભ સ્થળનું સરનામું, વગેરે તો હોય જ, પણ એથીય વિશેષ તો આમંત્રણ પાઠવનારી વ્યક્તિના હૃદયની ભાવના હોય અને આ જ કારણસર કંકોતરીની  પરંપરા હજી જળવાઇ રહી છે.

બહુ મર્યાદિત સંખ્યામાં કંકોતરી છપાવવાની હોય એટલે કેટલાક પામતાં-પહોંચતાં લોકો એ કસ્ટમાઈઝ્ડ પણ કરાવે છે, જેમાં લાગણી નીતરતી વાત વણી શકાય. વડોદરાનાં ગૃહિણી આરતી મહેશ્વરી એમાં મહારત ધરાવે છે. આરતીબહેન યજમાનના હૃદયના ભાવ કંકોતરીમાં ઉતારી આપવાનું કામ કરે છે. ખાસ હાથે બનાવેલાં અને જાતે ગ્રાહકની જરૂરત મુજબ ડિઝાઈન કરી આપેલાં વેડિંગ કાર્ડ અને અન્ય આમંત્રણ પત્રિકા તૈયાર કરવાનું કામ આરતી મહેશ્વરી પાછલા અઢી દાયકાથી કરે છે.