શું છે આ એક... બે... ત્રણ?

દેશની પહેલી બુલેટ ટ્રેનના પહેલા સ્ટેશન પછી અમદાવાદમાં બન્યું છે રેલવે, બસ અને મેટ્રો એમ ત્રણ-ત્રણ ટ્રાન્સપોર્ટ સિસ્ટમનું જોડિયું મલ્ટિમોડેલ ટ્રાન્સપોર્ટ હબ.

- મહેશ શાહ

ગુજરાતમાં સૌપ્રથમ બીઆરટીએસ (બસ રેપિડ ટ્રાન્ઝિટ સિસ્ટમ) સ્ટૅન્ડ અને મેટ્રો રેલનું પ્રથમ સ્ટેશન બન્યું અમદાવાદમાં. થોડા સમય પહેલાં બુલેટ ટ્રેન માટે રેલવે ટર્મિનલ બન્યું, એ પણ અમદાવાદમાં. તો હવે અમદાવાદમાં તૈયાર છે મલ્ટિમોડેલ ટ્રાન્સપોર્ટ હબ.

ગુ વિશેષતા એ કે રેલવે ટર્મિનલ દેશની પ્રથમ બુલેટ ટ્રેન માટે બન્યું, જ્યારે સાબરમતી મલ્ટિમોડેલ ટ્રાન્સપોર્ટ હબ એ બીઆરટીએસ, મેટ્રો ટ્રેન અને રેલવે એમ ત્રણ માધ્યમનું કનેક્ટિવિટીનું અત્યાધુનિક કેન્દ્ર બનશે. એ બન્યું છે અહીંના સાબરમતી વિસ્તારમાં.

હેરિટેજ સિટી અને સ્માર્ટ સિટી અમદાવાદના સાબરમતી વિસ્તારમાં સાબરમતી નામ આધારિત સાબરમતી આશ્રમ, સાબરમતી જેલ, સાબરમતી રિવરફ્રન્ટ, વગેરે આવેલાં છે. એ યાદીમાં ઉમેરો થયો છે નવનિર્મિત સાબરમતી મલ્ટિમોડેલ ટ્રાન્સપોર્ટ હબનો. એની પડખે છે સાબરમતી હાઈ સ્પીડ રેલવે પડખે છે સાબરમતી હાઈ સ્પીડ રેલવે  ટર્મિનલ. દેશની પ્રથમ હાઈ સ્પીડ એટલે કે બુલેટ ટ્રેનનું સાબરમતી ખાતેનું આ ટર્મિનલ છે. દેશના પ્રથમ બુલેટ ટ્રેન પ્રોજેક્ટનું ભૂમિપૂજન તો છ વર્ષ અગાઉ જ વડા પ્રધાન નરેન્દ્ર મોદી અને જપાનના તત્કાલીન વડા પ્રધાન શિન્ઝો આબેએ કર્યું હતું.

થોડા દિવસ પહેલાં રેલવેમંત્રી અશ્વિની વૈષ્ણવે સોશિયલ મિડિયા પર એક વિડિયો પોસ્ટ કરીને લખ્યુંઃ ટર્મિનલ ફૉર ઈન્ડિયાસ ફર્સ્ટ બુલેટ ટ્રેન... સાબરમતી મલ્ટિમોડેલ ટ્રાન્સપોર્ટ હબ, અમદાવાદ.

આ મલ્ટિમોડેલ હબનું વડા પ્રધાન નરેન્દ્ર મોદી નજીકના ભવિષ્યમાં લોકાર્પણ કરે એવી સંભાવના છે.

પહેલાં જાણીએ વડા પ્રધાનના ડ્રીમ પ્રોજેક્ટ એવા દેશના પ્રથમ બુલેટ ટ્રેન પ્રોજેક્ટ વિશે. મુંબઈ-અમદાવાદ વચ્ચે દોડનારી દેશની પ્રથમ હાઈ સ્પીડ બુલેટ ટ્રેનના પ્રોજેક્ટને મુંબઈ-અમદાવાદ હાઈ સ્પીડ રેલ (MAHSR) કોરિડોર નામ આપવામાં આવ્યું છે. આ પ્રોજેક્ટનાં બાંધકામ, નિભાવ, સંચાલન વહીવટ, વગેરે કામગીરી માટે ભારત સરકાર અને બુલેટ ટ્રેન સાથે સંકળાયેલાં રાજ્યો દ્વારા નૅશનલ હાઈ સ્પીડ રેલ કૉર્પોરેશન લિમિટેડ (NHSRCL)ની સ્થાપના થઈ છે.