વિઝા વિના રે ન જશો હવે દેશ અમેરિકા...

તમારી પાસે એક-દોઢ કરોડ રૂપિયા હોય તો ભારતમાં આસાનીથી કોઈ ધંધો જમાવી શકો. અરે, એ રકમના વ્યાજે પણ નિરાંતે જિંદગી કાઢી શકો, છતાં ઘણા ગુજરાતીઓ આટલી તોતિંગ રકમ એજન્ટને ચૂકવીને ગેરકાયદે અમેરિકામાં ઘૂસવાનો માર્ગ પસંદ કરે છે. હવે તો એજન્ટો ઘૂસણખોરો માટે ચાર્ટર્ડ ફ્લાઈટ બુક કરતા હોવાનું બહાર આવ્યું છે.

- ઉમંગ વોરા

વર્ષ ૨૦૨૨ની એક સવારે અમેરિકા-કેનેડાની સીમા નજીક ચાર મૃતદેહ મળી આવ્યા. એક દંપતી ને બે બાળક. સ્થાનિક પોલીસને એ સમજતાં વાર ન લાગી કે આ પરિવાર કેનેડાથી ગેરકાયદે અમેરિકામાં ઘૂસવાની પેરવીમાં હશે, પણ ભારે બરફવર્ષાને કારણે રસ્તો ભૂલી ગયો હશે અને એકદમ શીત વાતાવરણમાં ચારે જણ ઠરીને ઠીકરું થઈ ગયાં હશે. દેખાવ અને પહેરવેશ પરથી આ ચારેય એશિયન હોય એવું જણાતું હતું.

કેનેડિયન પોલીસની ધારણા સાચી હતી. એ ચાર જણ ભારતનાગુજરાત ના હતાઃ ગાંધીનગર જિલ્લાના કલોલ તાલુકામાં આવેલા ડીંગુચા ગામના વતની જગદીશ પટેલ, એમનાં પત્ની વૈશાલી, પુત્રી વિહાંગી અને પુત્ર ધાર્મિક. આ પરિવાર ખરેખર અમેરિકામાં ગેરકાયદે પ્રવેશવાનો પ્રયાસ કરી રહ્યો હતો.

આ ઘટનાને બે વર્ષ થઈ રહ્યાં છે ત્યારે ઘૂસણખોરીના આવા જ પ્રયાસનો વધુ એક કિસ્સો સામે આવ્યો છે. જો કે આ કિસ્સો બહુ મોટો છે. એમાં તો સાગમટે ૩૦૦ જણ અમેરિકામાં ગેરકાયદે ઘૂસવાના ઈરાદે અહીંથી નીકળ્યા હતા. ગુજરાત, પંજાબ, તામિલનાડુ, મહારાષ્ટ્ર એમ જુદાં જુદાં રાજ્યોના આ લોકો જુદી જુદી ફ્લાઈટ્સ દ્વારા દુબઈ પહોંચ્યા. ત્યાંથી એમને એક ચાર્ટર્ડ પ્લેન દ્વારા મધ્ય અમેરિકાના નિકારાગુઆ દેશના માનાગુઆ ઍરપોર્ટ લઈ જવાના હતા. એ પછી ત્યાંથી જમીનમાર્ગે ત્રણ દેશોની સરહદ પાર કરાવી એમણે એમના સપનાંના દેશ અમેરિકા પહોંચવાનું હતું, પણ...

૨૧ ડિસેમ્બરે દુબઈથી ઊપડેલી એમની ફ્લાઈટે ફ્રાન્સના નાનકડા વેટ્રી ઍરપોર્ટ પર ઈંધણ ભરવા માટે લૅન્ડિંગ કર્યું એ વખતે કોઈક રીતે આ કૌભાંડનો ભાંડો ફૂટી ગયો. વિમાનમાં ૩૦૩ ભારતીયો ગેરકાયદે અમેરિકા જવા માટે નીકળ્યા હોવાની માહિતી મળતાં આ ફ્લાઈટને ફ્રાન્સમાં જ રોકી દેવામાં આવી. આ ફ્લાઈટમાં મહેસાણા જિલ્લાના જ ૯૬ લોકો હોવાનું કહેવાય છે. આ ફ્લાઈટમાં પ્રવાસ કરનારા દરેક ભારતીય પાસેથી અમેરિકામાં ગેરકાયદે પ્રવેશ આપવા માટે ૮૦ લાખથી એક કરોડ રૂપિયા લેવામાં આવ્યા હોવાની શંકા છે.