ઓ મારા ભગવાન.. ગૉડ સામે તારા સિંહ ટકે ખરો?

‘ઓએમજી-૨’, 'ગદર-ટુ' અને ઈતિહાસનું પુનરાવર્તન-ટુ: એકાદ દાયકા પહેલાં તારા સિંહે 'લગાન’ના ભુવનને હંફાવેલો, પણ હવે સ્પર્ધા ભગવાન શિવ સાથે છે.

- રઘુ જેટલી

શ્રીમદ્ ભગવદ્ગીતાનો શ્લોક છેઃ જ્યારે જ્યારે ધર્મની હાનિ ને અધર્મની બોલબાલા થતી લાગશે ત્યારે ત્યારે હું પ્રકટ થાઉં છું.. એકાદ દાયકા પહેલાં નાસ્તિક કાનજીભાઈ (પરેશ રાવલ)ને જ્યારે ઈન્સ્યોરન્સ કંપનીવાળા ગંડાવી રહ્યા હતા ત્યારે એમની વહારે ભગવાન શ્રીકૃષ્ણ આવેલા (ઓ માય ગૉડ). હવે ચુસ્ત શિવભક્ત કાંતિશરણ મુદગલ (પંકજ ત્રિપાઠી)ની વહારે ભોલાનાથ આવે છે ઓ માય ગૉડ-૨માં. મધ્યમવર્ગી કાંતિશરણના દીકરાએ કંઈ એવું કર્યું છે, જેના લીધે એને સ્કૂલમાંથી કાઢી મૂકવામાં આવે છે. આટલું જ નહીં, પણ આખા શહેરમાં એ હેડ હેડ થાય છે, કાંતિશરણ સ્કૂલ પર કેસ કરે છે. સ્કૂલનાં વકીલાણી છે યામી ગૌતમ.

સંયોગથી સર્વશક્તિમાન ઈશ્વરની સાથે આવી રહ્યાં છે ટ્રકડ્રાઈવર સરદાર તારા સિંહ, સકીના અને એમનો પુત્તર જીતે.