જૂનાગઢનું એ ભયાનક જળતાંડવઃ હવે શું?

કાળવા નદીને કાંઠે વસેલા ગિરનાર તળેટીના પ્રાચીન જૂનાગઢ શહેરમાં પાંચ કલાકમાં ખાબકેલા દસથી બાર ઈંચ વરસાદે દાયકાઓમાં ન બની હોય એવી વિનાશક સ્થિતિનું સર્જન કરી દીધું ત્યારે લોકો બોલી ઊઠ્યાઃ ‘કાળવાને તમે ખૂબ દબાવ્યો, હવે કાળવો તમને દબાવે છે!’

- ધીરુ પુરોહિત (જૂનાગઢ)

‘સાહેબ, અમને બચાવી લ્યો. અમારાં ઘર પાણીમાં ડૂબી રહ્યાં છે, અમને બચાવો.. એક બહેનનો આવો ફોન આવ્યો અને મારું હૃદય દ્રવી ઊઠ્યું. પ્રશાસને તત્કાલ પગલાં લીધાં અને એ સોસાયટીના લોકો બચી ગયા..’ કલેક્ટર અનિલકુમાર રાણાવસિયાના આ શબ્દો જૂનાગઢના સોશિયલ મિડિયામાં ખૂબ ચાલી રહ્યા છે.

એ વાત પણ સાચી છે. શનિવાર, ૨૨ જુલાઈનો એ દિવસ જૂનાગઢના પ્રજાજનો ક્યારેય નહીં ભૂલી શકે. એ દિવસે એમની આંખ સામે મોત નાચતું હતું. ગિરનાર વિસ્તારમાં જાણે આભ ફાટ્યું હોય એમ વરસાદ પડ્યો અને એનું પાણી જૂનાગઢની કાળવા નદીમાં ઠલવાયું. જે નદીનાં પાણી જોઈ જોઈને અહીંના લોકો મોટા થયા છે એ જૂનાગઢ શહેરની વચ્ચેથી વહેતી કાળવા નદીમાં અચાનક એટલાં પ્રચંડ પૂર આવ્યાં કે રસ્તા પર જતાં વાહનો સાથે માણસો ઊછળીને સેંકડો ફૂટ દૂર ફંગોળાતા રહ્યા. સેંકડો વાહનો અને પશુઓ તણાયાં, લોકો ટીવી, ફ્રિજ, ફર્નિચર, વગેરે ઘરવખરી અને પૈસા સુદ્ધાં જેમનાં તેમ મૂકી ઘરના બીજા માળે ચડી ગયા. જેની પાસે એક જ માળનાં મકાન હતાં એ તો ગળા સુધી ડૂબતાં રહ્યાં.

પાણીનો પ્રકોપ એટલો હતો કે આખીને આખી દીવાલો ધસી પડી તો ક્યાંક મકાનના ટુકડા એની સાથે વહી ગયા. રમકડાંની જેમ ભારેખમ ગાડીઓ તરતી તરતી ક્યાંને ક્યાં ફંગોળાઈ ગઈ ને અમુકની દશા તો સાવ ઓળખાય નહીં એવી થઈ ગઈ.