રસી છે વિવિધ બીમારી સામેનું સુરક્ષા કવચ

કોરોના વાઈરસ ડિસીઝના કેસ ફરી વધી રહ્યા છે તો કૂતરા કરડવાના કિસ્સામાં પણ વધારો થયો છે. એને કારણે આ બન્ને સહિત અનેક ઉપાધિના રામબાણ ઈલાજ સમી વિવિધ રસી નવેસરથી ચર્ચાએ ચડી છે.

- મહેશ શાહ (અમદાવાદ)

ગુજરાતનાં અખબારોમાં છેલ્લા કેટલાક દિવસો દરમિયાન ચમકેલા સમાચાર જુઓ..

અમદાવાદ અને બીજાં શહેરોનાં બાળકો ઓરીનો ભોગ બન્યાં.. ચાર વર્ષમાં આશરે સાડા બાર લાખ લોકોને કૂતરા કરડ્યા.. કોરોનાએ ફરી માથું ઊંચક્યું..

યોગાનુયોગ ત્રણેયનો ઉપાય એક સમાન છેઃ વેક્સિન એટલે કે રસી. આ શબ્દ સાંભળતાંવેંત બાળકોને અપાતી ત્રિગુણી રસી અને પોલિયો રસીનાં ટીપાં પિવડાવવાની ઝુંબેશનું સ્મરણ થઈ આવે.. અને એથીય વિશેષ તો કદી નહીં ભુલાય એવી કોરોના મહામારી સમયે અપાયેલી વેક્સિન યાદ આવે, એ વખતે રસી લેવાની લાઈનનાં દશ્યો આંખ સામે તરવરે. મહત્ત્વનું એ કે કોરોનાનું સંક્રમણ અટકાવવાના એકમાત્ર વિકલ્પ એવી વેક્સિન વિશ્વના કરોડો લોકોએ લીધી. ભારતે તો અનેક દેશને રસી પહોંચતી કરી માનવધર્મ પણ નિભાવ્યો.

પાછલા દિવસોમાં ગુજરાતમાં ઘણાં બાળકો ઓરીનો ભોગ બન્યાં છે. એ અગાઉનાં ત્રણ વર્ષમાં ૨૯૯૫ બાળકોને ઓરી થયો.

જીવલેણ રોગ ઓરી (મિઝલ્સ), ગાલપચોળા (મમ્પ્સ) અને ચેપી રોગ રુબેલા સામે રક્ષણ આપવા એમએમઆર એવા ટૂંકા નામે ઓળખાતી રસી આપવામાં આવી છે. કેન્દ્ર સરકારે આ વર્ષના અંત સુધીમાં દેશને ઓરીમુક્ત કરવાનું જાહેર કર્યું છે. એના ભાગ રૂપે અમદાવાદ મહાપાલિકાએ અંદાજે ૧.૩૨ લાખ બાળકોને એમએમઆર વેક્સિન આપી.

-તો કૂતરું કરડ્યું હોય એવા લોકોએ ઍન્ટિ રેબીઝ (હડકવાં વિરોધી) વેક્સિનનાં ઈન્જેક્શન લીધાં. એ જ રીતે કોરોના વાઈરસે પાછો ઉપાડો લીધો છે એટલે સરકારે એની રસીના ત્રીજા (બૂસ્ટર) ડોઝ માટે ફરી લોકોને ઢંઢોળવા માંડ્યા છે.

આપણે ત્યાં જુદા જુદા વયનાં બાળકો, અમુક કિસ્સામાં પુખ્ત વયના લોકોને જુદી જુદી બીમારી સામે રક્ષણ માટે રસી અપાય છે. રસી સોના આરોગ્ય માટે સુરક્ષા કવચ છે. ખાસ તો દરેક બાળકને ડૉક્ટરની સલાહ મુજબ સમયે સમયે રસી મુકાવવી હિતાવહ ગણાય છે. રસીથી બાળ મૃત્યુદર ઘટી શકે અને પોલિયો જેવી વ્યાધિથી કાયમ માટે દૂર રહી શકાય.