ફિર છિડી રાત, બાત ફૂલોં કી..રાત હૈ યા બારાત ફૂલોં કી..

મહેમાનોને મંત્રમુગ્ધ કરી દેતી સજાવટ વિના લગ્નપ્રસંગ અધૂરો ગણાય છે. એક કાબેલ ડેકોરેટર વેડિંગ થીમને ઓપ આપવા વિવિધ કસબીઓની કળાનો ઉપયોગ કરીને ફલ-પાંદડાં, આર્ટ પીસીસ, ફર્નિચર-ફેબ્રિક્સ, પ્રકાશ સંરચનાનું અદ્ભુત સંયોજન રચે છે. શું છે મૅરેજ ડેકોરેશનના આજકાલ ટ્રેન્ડ?

- સમીર પાલેજા (મુંબઈ)

છેલ્લાં કેટલાંક વર્ષથી નવરાત્રિમાં નવે દિવસ જુદા જુદા રંગનાં વસ્ત્રો પહેરવાની પ્રથા ચાલી છે એમ દર વર્ષે લગનસરામાં પણ ડેકોરેશનના જુદા જુદા રંગ નક્કી થાય છે. આ વર્ષે અર્થાત્ ૨૦૨૩ માટે ઈન્ટરનૅશનલ ડેકોરેટર્સે પિચ (આછો કેસરી) અને લાઈલક (આછો જાંબુડી) રંગ પસંદ કર્યા છે. એટલે જ ઈન્ટરનૅશનલ ટ્રેન્ડ્સનું પાલન કરનારા ભારતીય ડેકોરેટર્સે સુશોભિત કરેલાં કોઈ પણ લગ્નમાં આજકાલ પિચ અને લાઈલકના શેડ્સની મહેફિલ જોવા મળે છે.

કમુરતાંના દિવસો બાદ કરો તો દેવ દિવાળીથી શરૂ થયેલી લગ્નની સીઝન છેક મે મહિના સુધી પુરજોશમાં ચાલવાની છે એટલે અત્યારના ટ્રેન્ડ પ્રમાણે આ લગ્નમંડપની સજાવટમાં આ રંગોનું પ્રભુત્વ હજી જોવા મળશે.

મુંબઈમાં સિક્સ સીઝન્સ સ્ટુડિયો ચલાવતા ક્રિયેટિવ આર્ટ ડિરેક્ટર અનિશ વેદિયા ચિત્રલેખાને કહે છે: ડેકોરેટર તરીકે અમે સૌથી પહેલાં તો વર-કન્યાને મળીને એમનો ટેસ્ટ જાણીએ છીએ. પછી એમણે કલ્પેલાં લગ્નને વાસ્તવિકતામાં પરિવર્તિત કરવા જાતજાતનાં એલિમેન્ટ્સનું સંયોજન કરીએ. કોઈ પણ સજાવટમાં સ્થળ, સમય, ઋતુ અને થીમ પ્રમાણે સુશોભન થાય છે.’

પોતાના ક્લાયન્ટ્સને એ ટુ ઝેડ વેડિંગ સોલ્યુશન પૂરું પાડતા અનિશભાઈનું મુખ્ય કામ લગ્નસમારંભના જુદા જુદા પ્રસંગોને યોગ્ય સજાવટથી દીપાવવાનું છે. એમના કહેવા મુજબ, રૉયલ વેડિંગ હોય તો અલગ ડેકોરેશન થાય, બીચ વેડિંગમાં જુદી સજાવટ હોય અને કાર્નિવલિશ એટલે કે ઉત્સવની ધમાલનો થીમ હોય તો એ પ્રમાણેનું સુશોભન થાય. આજકાલ ફેરી લાઈટ વેડિંગ બહુ ચાલે છે. ખાસ કરીને કન્યાઓને સ્ટાર્સનું ડેકોરેશન પસંદ પડે છે.