કુસ્તી મહાસંઘમાં વિવાદનું દંગલ

ભાજપના દબંગ નેતા અને ૧૧ વર્ષથી ‘ભારતીય કુસ્તી મહાસંઘ’ના અધ્યક્ષ બ્રિજભૂષણ શરણસિંહ આમ તો કોઈ ને કોઈ બબાલના કેન્દ્રમાં રહ્યા છે, પણ આ વખતે આરોપોની ગંભીરતા અને આરોપ મૂકનારા પહેલવાનોની હાઈ પ્રોફાઈલ ઓળખને કારણે એમના માટે મુશ્કેલી વધી છે. આ દંગલનો અંજામ ન્યાયની રિંગ વાગીને આવશે ખરો?

- 

બ્રિજભૂષણ શરણસિંહ આક્ષેપના અખાડામાં.

આ પ્રદર્શન, સંતોષકારક કાર્યવાહી વગર પ્રદર્શનકારીઓની ટસના મસ થવાની મનાઈ.. દિલ્હીના જંતર-મંતર નજીકના મેદાનમાંથી આમ તો આવાં ધરણાં, સરઘસ કે વિરોધસભાના સમાચાર રોજબરોજ આવતા રહેતા હોય છે, પણ આ વખતે ન્યાય માગનારાં અને આક્ષેપનો સામનો કરનારાં નામ એવાં હાઈ વોલ્ટેજ છે કે આખા દેશમાં વીજકરન્ટનું મોજું ફરી વળ્યું છે.

ઑલિમ્પિક્સ, કૉમનવેલ્થ ગેમ્સ જેવી આંતરરાષ્ટ્રીય સ્પર્ધાઓમાં ભારતનું નામ રોશન કરનારાં વિનેશ ફોગાટ, બજરંગ પુનિયા, સાક્ષી મલિક, રવિ દહિયા, સરિતા મોર, સુમિત મલિક.. જેવાં દેશનાં ટોચનાં રેસલર્સ-કુસ્તીબાજોએ બાંયો ચડાવી છે. રેસલિંગ ફેડરેશન ઑફ ઈન્ડિયા (ભારતીય કુસ્તી મહાસંઘ)ના અધ્યક્ષ બ્રિજભૂષણ શરણસિંહ સામે.

બ્રિજભૂષણ કુસ્તી મહાસંઘના અધ્યક્ષ ઉપરાંત ઉત્તર પ્રદેશની કેસરગંજ બેઠક પરથી ભાજપના લોકસભાના સાંસદ અને આસપાસના છ જિલ્લામાં મજબૂત પ્રભાવ ધરાવતા એક કદાવર નેતા છે.