ગામનો પણ હોય ડે.. સોળ વર્ષથી ઊજવાય છે ધર્મજ ડે!

ધર્મજનો ક્લૉક ટાવર અને વૉટર પાર્ક. આ ગામ છે બહું નિરાળું.

- 

૧૨ જાન્યુઆરીનો દિવસ દેશભરમાં સ્વામી વિવેકાનંદ જયંતી તરીકે ઊજવાય છે. જો કે આ દિવસે ગુજરાતમાં એક ગામની નામજોગ ઉજવણી પણ થાય છે. એ ગામ એટલે ધર્મજ. 

ધર્મજ એ ચરોતર પ્રદેશનું સમૃદ્ધ ગામ છે. ધર્મજવાસીઓ પોતાને ધર્મજિયન કહે છે. આઝાદી બાદ ધર્મજમાં વ્યાયામ મંદિર, પાઈપલાઈનથી પાણી, વીજળીકરણ, ભૂગર્ભ ગટર, અંગ્રેજી શાળા, વગેરે સુવિધા બની. અત્યારે દસેક હજારની વસતિ ધરાવતા ધર્મજમાં ૧૩ બૅન્ક, શાળા-કૉલેજો, હૉસ્પિટલો, વિપશ્યના કેન્દ્ર, વગેરે છે. મુખ્યત્વે ખેતી તમાકુની, તો અમુક પ્રગતિશીલ ખેડૂતોએ કેળ, મરચાં અને બાગાયતી પાક લેવાની પણ પહેલ કરી છે. ગામના સમાજપ્રેમી યુવક રાજેશ પટેલે ધર્મજ: એક ઉદાહરણીય ગામ પુસ્તક લખ્યું. પછી આ ગામના નામે કૉફી ટેબલ બુક પણ બની.

બીજા ચરોતરવાસીઓની જેમ આણંદ જિલ્લાના ધર્મજવાસીઓ પણ અમેરિકા, બ્રિટન, ઑસ્ટ્રેલિયા, કેનેડા, આફ્રિકા તથા ન્યુઝીલૅન્ડ જેવા દેશોમાં વર્ષોથી સ્થાયી થયા. વર્ષો પહેલાં લંડનમાં મનહર પટેલે ધર્મજ સોસાયટી ઑફ લંડન સ્થાપેલી. વિદેશમાં વસતા ગુજરાતીઓ ઘણેઅંશે ડિસેમ્બર-જાન્યુઆરીમાં વતન આવે. પછી પરિવાર અને સ્વજનો સાથે હળેમળે-ફરે. શુભ પ્રસંગો યોજે કે એમાં ભાગ લે. શૉપિંગ કરે. અમુક આરોગ્ય સારવાર કરાવે. પછી પ્રવાસ પૂરો.