માર્કેટ સેન્ટિમેન્ટની કમાલ.. આઈપીઓની ધમાલ

ઉત્તરાયણમાં જેમ ‘કાયપો છે..’નો શોરબકોર ચાલે એમ પ્રાઈમરી માર્કેટમાં આઈપીઓની બોલબાલા સતત વધી રહી છે. અત્યારે રિટેલ રોકાણકારો, પ્રવાહિતા, સેન્ટિમેન્ટ-ટ્રેન્ડ અને ગ્રે માર્કેટ જોરમાં છે એટલે ઈન્વેસ્ટર્સે વધુ સજાગ બની સિલેક્શન કરવું પડશે.

- જયેશ ચિતલિયા

માનો કે ન માનો જેવી વાત છે, પણ હવેના સમયમાં અને ભૂતકાળના અનુભવના આધારે મૂલવીએ તો આઈપીઓની ક્વૉલિટીમાં સુધારો થઈ રહ્યો છે. એમાં વળી બજારની વૉલેટિલિટી સાથે ઓવરઑલ તેજીનો કરન્ટ ઉમેરાયો હોવાથી હવે આઈપીઓની ફરી લાંબી કતાર લાગવાની શક્યતા વધી છે.

૨૦૨૨ની વાત કરીએ તો આ વર્ષ દરમિયાન આવેલા આઈપીઓમાંથી ૭૫ ટકાથી વધુ આઈપીઓના ભાવ એની ઑફર પ્રાઇસથી ઊંચા બોલાઈ રહ્યા છે, જે એની ક્વૉલિટીના પુરાવા કહી શકાય. અલબત્ત, ક્યાંક ભાવોની રમત પણ હોઈ શકે, કેમ કે આ આઈપીઓના ભાવોમાં ગ્રે માર્કેટ-બિનસત્તાવાર બજારની વધ-ઘટ પણ શરૂના દિવસોમાં અસર કરતી હોય છે અને હા, પચ્ચીસ ટકા એવા આઈપીઓને પણ યાદ રાખવા જોઈએ, જેણે રોકાણકારોને નિરાશ કર્યા છે.