પ્રતિભાને પોંખવાની પળ

‘ચિત્રલેખા’ના પત્રકાર કેતન મિસ્ત્રી, પાર્શ્વગાયક મનહર ઉધાસ તથા કવિ-ગઝલકાર નીતિન વડગામાને ‘હરીન્દ્ર દવે સ્મૃતિ પારિતોષિક’ એનાયત.

- સમીર પાલેજા (મુંબઈ)

નીતિન વડગામા

આ શબ્દયજ્ઞમાં આપણે બધા પાવલું પાવલું ઘી ઉમેરવા આવ્યા છીએ..

જાણીતા કથાકાર મોરારિબાપુના આ કથનને દર્શકોએ તાળીઓના ગડગડાટથી વધાવી લીધું. પ્રસંગ હતો જન્મભૂમિ વર્તમાનપત્રોના ભૂતપૂર્વ તંત્રી હરીન્દ્ર દવેની સ્મૃતિમાં પ્રતિ વર્ષ આપવામાં આવતાં પારિતોષિક એનાયત કરવાનો. વર્ષ ૨૦૨૧નું આ સમ્માન કવિ-ગઝલકાર નીતિન વડગામા, પાર્શ્વગાયક મનહર ઉધાસ તથા ચિત્રલેખાના વરિષ્ઠ પત્રકાર કેતન મિસ્ત્રીને આપવામાં આવ્યું.

મનહર ઉધાસ

મોરારિબાપુ કહે કે સ્વર્ગસ્થ હરીન્દ્રભાઈની સ્મૃતિમાં દર વર્ષે યોજાતા આ સાત્ત્વિક પ્રસંગમાં લગભગ મારી ઉપસ્થિતિ રહી છે, એનો આનંદ છે. આજે પોંખાઈ રહેલા ત્રણેય સર્જકોનાં સર્જનનું કેન્દ્રબિંદુ શબ્દ છે. આપણો ઋષિ શબ્દબ્રહ્મ છે. શબ્દને વેડફતાં વાર લાગતી નથી, પણ શબ્દ અપરાધનું કોઈ પ્રાયશ્ચિત્ત પણ નથી.

યુવા ગાયક રાઘવ દવેએ હરીન્દ્રભાઈની રચના રજૂ કરી કાર્યક્રમનો માહોલ બાંધ્યો અને એ જ માહોલને આગળ વધારતા કાવ્યમરમી અને કવિતા સામયિકના તંત્રી રમેશ પુરોહિતે સાહિત્ય વિભાગના પારિતોષિક વિજેતા કવિ-ગઝલકાર નીતિન વડગામાનો પરિચય આપતાં કહ્યું: ‘એમના સર્જનમાં ગેરુઓ રંગ અર્થાત્ અધ્યાત્મ વધારે છલકાય છે. સામાન્ય માણસને સમજાય એવી સરળ ભાષામાં એ ગહન વિચારો રજૂ કરે છે. નીતિનભાઈએ ભાષા અને સાહિત્યનાં વિકાસ તથા સંવર્ધન માટે વિવેચન, સંશોધન, સંપાદનમાં નોંધપાત્ર પ્રદાન કર્યું છે તથા અનેક તેજસ્વી વિદ્યાર્થીઓ પણ તૈયાર કર્યા છે.’

કેતન મિસ્ત્રી