ઘરેલુ હિંસાની વધતી જતી ઘટના મહામારીની સાઈડ અને ગંભીર ઈફેક્ટ

લૉકડાઉનના સમયમાં ચાર દીવાલ વચ્ચે થતી હિંસાના કિસ્સામાં નોંધપાત્ર વધારો થયો એના ચોંકાવનારા આંકડા આવ્યા છે. વધુ ચોંકાવનારી હકીકત એ કે આવી જંગલિયતનો સામનો કરતી ૮૭ ટકા જેટલી મહિલા ડિપ્રેશન સાથે જીવી રહી છે. આવી સ્ત્રી ક્યારે કેવું આત્યંતિક પગલું ભરી બેસે એ કહેવાય નહીં. શું છે ડોમેસ્ટિક વાયોલન્સને અટકાવવાના ઉપાય?

- કેતન મિસ્ત્રી

થોડા સમય પહેલાં નેટફ્લિક્સ પર એક સનકી સોશિયલ થ્રિલર ફિલ્મ આવીઃ ડાર્લિંગ્સ. ઘરેલુ હિંસા અર્થાત્ ડોમેસ્ટિક વાયોલન્સ વિશે બનેલી આ એક સામાજિક નિસબતવાળી, પણ સિરિયસ સોશિયલ પ્રોબ્લેમનો વાહિયાત, વિચિત્ર ઉકેલ આપતી ફિલ્મ હતી. પતિ દ્વારા થતી મારઝૂડ વિશેની આ ફિલ્મમાં પતિ (વિજય વર્મા)ની સતત મારઝૂડથી ત્રાસેલી બદરુ (આલિયા ભટ્ટ) પોલીસફરિયાદ નોંધાવવા જાય છે ત્યારે પોલીસ અધિકારી કહે છેઃ ‘અરે, પતિની મારકૂટ તો આપણે તરત બંધ કરાવી શકીએ... હવે દુનિયા બદલાઈ ગઈ છે.’ ત્યારે બદરુની મા (શેફાલી શાહ) પોલીસને કહે છેઃ જે લોકો ટ્વિટર પર છે એમને માટે કદાચ દુનિયા બદલાઈ ગઈ હશે... અમારા જેવા લોકો માટે નહીં.’

આ પહેલાં તાપસી પન્નૂવાળી થપ્પડ અને એથી પહેલાં સિક્રેટ સુપરસ્ટારમાં સ્ત્રી સામે વાયોલન્સના વિષયવાળી ફિલ્મો આવી. ફિલ્મી દુનિયામાંથી વાસ્તવિકતા તરફ પાછા ફરીએ તો ૨૧મી સદીને વિજ્ઞાનનો યુગ કહેવામાં આવે છે, પણ એવો એક પણ દિવસ નહીં હોય જ્યારે વર્તમાનપત્રમાં મહિલા ઉત્પીડનના, ખાસ કરીને ઘરેલુ હિંસાના સમાચાર પ્રકાશિત થયા ન હોય.

એક સર્વસામાન્ય માન્યતા એવી હોય છે કે પત્નીની મારઝૂડ ને મહિલા વિરુદ્ધ હિંસા અને એવું બધું તો સમાજના નીચલા વર્ગનાં ઘરોમાં જ બને. હકીકત એ છે કે કહેવાતી હાઈ સોસાયટીની અને ટ્વિટર પર રહેતી મહિલા પણ મારકૂટનો શિકાર બને છે, દુનિયાભરમાં બને છે, વિકસિત દેશોમાં પણ! આંકડા કહે છે કે દુનિયામાં દર ત્રીજી મહિલા એક યા બીજા જુલમનો શિકાર બને છે. દુનિયા બદલાઈ છે માત્ર એ રીતે કે હવે મહિલા ફરિયાદ નોંધાવવા માંડી છે. અહીં સવાલ એ થાય કે ન નોંધાયેલી ફરિયાદ કેટલી હશે?  કેટલી સ્ત્રી ચુપચાપ સહન કર્યે જતી હશે?

- અને એક ચોંકાવનારી હકીકત એ છે કે કોરોના મહામારી પહેલાં અને એ દરમિયાન સ્ત્રીને થતા અત્યાચારની સમસ્યા વકરી છે. નૅશનલ ક્રાઈમ રેકૉર્ડ્સ બ્યૂરોના આંકડા કહે છે કે ૨૦૨૧માં માત્ર મહારાષ્ટ્રમાં જ ઘરેલુ હિંસાના ૩૯,૫૦૦ કરતાં વધુ કેસ નોંધાયા. ૨૦૨૦ અને ૨૦૨૧માં ઘરની બહાર નીકળવા પર નિયંત્રણ હતાં એ સમયમાં ઘરમાં મારઝૂડના કિસ્સા વધ્યા. ૨૦૨૧માં લૉકડાઉનનાં નિયંત્રણ હળવાં થતાં આવા વધુ કેસ પ્રકાશમાં આવ્યા.