આ નવરાત્રિએ ગોહિલવાડનાં ગામોમાં થશે ધરતીની આરતી

ખેલૈયાઓ ભલે ગરબે રમે, ગોહિલવાડના કેટલાક કિસાનો પ્રકૃતિની રક્ષાના સંદેશ સાથે ગામેગામ ફરશે.

- 

એક વર્ષમાં આપણે ત્યાં ચાર નવરાત્રિ ઊજવાય છે અને આ ચારેય નવરાત્રિનું અલગ અલગ મહત્વ છે. એમાંય આદ્યશક્તિની આરાધના સાથે સંગીતના તાલે લેવાતા રાસ-ગરબાને કારણે આસો નવરાત્રિ દુનિયાભરમાં લોંગેસ્ટ ડાન્સ ફેસ્ટિવલ તરીકે જાણીતી બની રહી છે.

કોરોનાનો આતંક ઓછો થયો છે એટલે આ વખતે નવરાત્રિમાં અગાઉની જેમ રાસ-ગરબાની ધૂમ મચશે. જો કે ૨૬ સપ્ટેમ્બરથી પ્રારંભ થઈ રહેલી આ નવરાત્રિમાં ગોહિલવાડના ખેડૂતોએ કંઈક અલગ જ રીતે મા ધરતીની આરતી અને પ્રકૃતિની આરાધના કહી શકાય એવું વિશેષ આયોજન કર્યું છે. નવરાત્રિના આ દિવસોમાં આરાધકો શક્તિ આરાધના અને ખેલૈયાઓ ગરબે ઘૂમતા હશે ત્યારે કેટલાક ખેડૂતો અને જાગ્રત નાગરિકો ધરતીને રસાયણથી મુક્ત કરવાના અને પ્રકૃતિને શુદ્ધ કરવાના પ્રયાસ સાથે ગામડે ગામડે રથ લઈને ફરતા હશે.