વતનપ્રેમ સંગે સારવારનું સાહસ ફળ્યું

રોજ સરેરાશ ૧૮ જોઈન્ટ રિપ્લેસમેન્ટ સર્જરી કરતા અમદાવાદની ‘શેલ્બી હૉસ્પિટલ’ના ખ્યાતનામ ઑર્થોપેડિક સર્જ્યન ડૉ. વિક્રમ શાહે આ ક્ષેત્રે શિક્ષણ અને સંશોધનમાં પણ નોંધપાત્ર પ્રદાન આપ્યું છે.

- 

થોડા સમય પહેલાંની વાત છે. આફ્રિકાના ઘાના દેશના બોલ્ગાટાંગા શહેરવાસી ચાર સંતાનનાં માતા અને નિવૃત્ત નર્સ નાન્સાતા સાલીફ અને એમના પતિ અમદાવાદ આવ્યાં. અમદાવાદની એમની આ પ્રથમ મુલાકાત હતી અને બન્ને ખૂબ ચિંતિત હતાં.

એનું કારણ એ કે ૬૫ વર્ષી નાન્સાતા ડિસેમ્બર, ૨૦૧૬માં ઘરકામ કરતી વખતે પડી ગયાં, એમાં પગે ફ્રેક્ચર થયું એટલે ઘાનાના વાબકુ શહેરમાં હિપ રિપ્લેસમેન્ટ સર્જરી કરાવી, પરંતુ ઈન્ફેક્શન થયું એટલે કુમાસી શહેરની હૉસ્પિટલના ડૉક્ટરે ફરીથી હિપ રિપ્લેસમેન્ટ સર્જરી કરી, જે સફળ ન થઈ. કમભાગ્ય ગણો તો એ પછી પણ પાંચ વખત હિપ રિપ્લેસમેન્ટની રિવિઝન સર્જરી કરાવવી પડી.

પરિણામ શું? તમામ સર્જરી ફેલ અને પીડા અસહ્ય. સારવારખર્ચ થયો એ વધારામાં. જો કે નાન્સાતા હિંમત ન હાર્યાં. એ અરસામાં એમને કોઈકે કહ્યું કે ભારતમાં અમદાવાદની ‘શેલ્બી હૉસ્પિટલ’ના ડૉ. વિક્રમ શાહે દેશવિદેશના અનેક દરદીઓની જોઈન્ટ રિપ્લેસમેન્ટ સર્જરી કરી છે એટલે ઘાનાવાસી દંપતી અમદાવાદ આવ્યાં. ખૂબ અરમાન સાથે આવ્યાં. કારણ, અહીં પણ હિપ રિપ્લેસમેન્ટ સર્જરી જ થવાની હતી. સર્જરી થઈ અને એ સફળ નીવડી. ‘શેલ્બી’માંથી હર્ષભેર વિદાય લેતાં નાન્સાતાએ ડૉ. વિક્રમ શાહને ગળગળા અવાજે કહ્યું: ‘સર, બિગ બિગ થેન્ક યુ.’

આ કિસ્સો યાદ કરી વિખ્યાત જોઈન્ટ રિપ્લેસમેન્ટ સર્જ્યન ડૉ. વિક્રમ શાહ કહે છે: ‘મેં દરદીની રિવિઝન સર્જરી (જૂનું ઈમ્પ્લાન્ટ દૂર કરીને નવું ઈમ્પ્લાન્ટ બેસાડવાની સારવાર)માં એસિટાબ્યુલમ (હિપ બોર્નનું સોકેટ કે જેમાં ફેમર ફિટ થાય)ને ખાસ ઈન્સ્ટ્રુમેન્ટેશનથી હાડકાંને નુકસાન કર્યા વિના રિવાઈઝ કર્યું. પછી સોકેટને મોટી સાઈઝના કપ અને સ્મૂથી વ્યવસ્થિત કર્યું અને પ્લાસ્ટિક લાઈનર મૂક્યાં.’

એ થકી વિદેશી દરદી નાન્સાતા પીડામુક્ત થયાં. વિદેશમાં છ વખત સર્જરી પછી ભારતમાં રિવિઝન સર્જરી સફળ થયાનો દેશનો આ સંભવતઃ પ્રથમ કેસ હતો.