રાજકાજ

કર્ણાટક કોંગ્રેસ સરકારનો મામલો ફરી મોવડી મંડળ પાસે

- ચાણક્ય

કર્ણાટકની કોંગ્રેસ સરકારમાં ફરી સત્તાની હિસ્સેદારી અંગે વિવાદ સર્જાયો છે અને એવી કક્ષાએ પહોંચ્યો છે કે મામલો દિલ્હી દરબારમાં પહોંચ્યો છે. કર્ણાટકમાં જ્યારે ચૂંટણી પછી કોંગ્રેસની સરકાર રચાઈ ત્યારે એવું નક્કી થયું હતું કે અઢી વર્ષ સિદ્ધરમૈયા મુખ્યપ્રધાન રહેશે અને ત્યાર પછી બીજા અઢી વર્ષ ડી.કે. શિવકુમાર મુખ્યપ્રધાન પદ સંભાળશે. અઢી વર્ષનો સમય પસાર થયા પછી સિદ્ધારમૈયાએ મુખ્યપ્રધાનપદ છોડવાનો ઇનકાર કરી દીધો અને કોંગ્રેસના મોવડી મંડળે પણ સિદ્ધારમૈયાને બીજા અઢી વર્ષ મુખ્યપ્રધાન પદે રહેવા સંમતિ આપી દીધી. ડી.કે. શિવકુમારને મોવડી મંડળે એ વખતે સમજાવેલા અને તેઓ સમજી ગયા હતા, પરંતુ એ સમજાવટ કેવા પ્રકારની હશે એ સ્પષ્ટ થતું નથી અને એટલે જ શિવકુમાર થોડા થોડા સમયે ફરી મુખ્યપ્રધાન બનવા માટે દાવો કરતા રહે છે અને દાવપેચ પણ અજમાવે છે. આ વખતે ફરી શિવકુમારે મોવડી મંડળ ઉપર સિદ્ધારમૈયાને હટાવવા માટે દબાણ લાવવાની રીતરસમ અજમાવી છે. ધારાસભ્યોની ટુકડીઓને શિવકુમાર પોતાની તરફેણમાં રજૂઆત માટે દિલ્હી મોકલવા માંડ્યા છે. એ સ્થિતિમાં હવે કોંગ્રેસ મોવડી મંડળે કર્ણાટકના મુદ્દે ગંભીર નિર્ણય કરવો પડે એવી સ્થિતિ સર્જાઈ છે.