നെറ്റ് ബാങ്കിങ്ങോ മൊബൈൽ ബാങ്കിങ്ങോ ഏതാണ് നല്ലത് ?

പ്ലേസ്റ്റോർ ആപ് സ്റ്റോർ എന്നീ ഔദ്യോഗിക സ്രോതസ്സുകളിൽ നിന്നുപോലും വ്യാജ ആപ്പുകൾ മൊബൈൽ ഫോണിലേക്കു ഡൗൺലോഡ് ചെയ്തെടുത്ത് തട്ടിപ്പിനിരയായവർ അനവധിയാണ്.

- സി.എസ്. രഞ്ജിത്ത് പ്രമുഖ കോളമിസ്റ്റും വേൾഡ് ബാങ്ക് കൺസൽറ്റന്റുമാണ് ലേഖകൻ,

സ്റ്റേറ്റ് ബാങ്ക് ഓഫ് ഇന്ത്യയുടെ യോനോ, ഐസിഐസിഐ ബാങ്കിന്റെ ഐ മൊബൈൽ, എച്ച്ഡിഎഫ്സി ബാങ്കിന്റെ എച്ച്ഡിഎഫ്സി ബാങ്ക് മൊബൈൽ തുടങ്ങി മൊബൈൽ ഫോണിലൂടെ ബാങ്കിങ് സേവനങ്ങൾ വിരൽത്തുമ്പിൽ നൽകുന്ന മൊബൈൽ ആപ്പുകൾ വ്യാപകമായെങ്കിലും യുപിഐ പിന്തുണയോടെ ജി പേ, ഫോൺ പേ തുടങ്ങിയ മൊബൈൽ ആപ്പുകളാണ് ഓൺലൈൻ പണമിടപാടുകൾ ജനകീയമാക്കിയത്. മൊബൈൽ ബാങ്കിങ് ലളിതവും സൗകര്യപ്രദവുമാണെങ്കിലും ഒളിഞ്ഞിരിക്കുന്ന ചതിക്കുഴികൾ കാണാതെ പോകരുത്. മൊബൈൽ ബാങ്കിങ് വ്യാപകമായതോടെ ഇന്റർനെറ്റ് ബാങ്കിങ് സേവനങ്ങൾക്കു പ്രാധാന്യം നഷ്ടപ്പെടുന്നുണ്ടോ എന്നു സംശയിക്കേണ്ടിയിരിക്കുന്നു.

നെറ്റ് ബാങ്കിങ് vs മൊബൈൽ ബാങ്കിങ്

ഒരു പഴ്സനൽ കംപ്യൂട്ടറോ ലാപ്ടോപ്പോ വഴി ഇന്റർനെറ്റ് കണക്ഷനിലൂടെ ബാങ്കിന്റെ, ധനകാര്യ സ്ഥാപനത്തിന്റെ ഔദ്യോഗിക വെബ്സൈറ്റിലൂടെ ഓൺലൈനായി ബാങ്കിങ് ഇടപാടുകൾ നടത്തുന്നതിനെയാണ് നെറ്റ് ബാങ്കിങ് എന്നു പറയുന്നത്. ഇത് ഓൺലൈൻ ബാങ്കിങ്, ഇ-ബാങ്കിങ്, ഇന്റർനെറ്റ് ബാങ്കിങ് എന്നെല്ലാം അറിയപ്പെടുന്നു. ഇന്റർനെറ്റ് ബാങ്കിങ് സേവനത്തിന് റജിസ്റ്റർ ചെയ്തവർക്ക് കസ്റ്റമർ ഐഡിയും പാസ്വേഡും ഉപയോഗിച്ചു ബാങ്കിങ് സേവനങ്ങൾ ഇന്റർനെറ്റ് വഴി നടത്താം. ഇടപാടുകൾക്കു സുരക്ഷിതത്വം ഉറപ്പാക്കാനായി റജിസ്റ്റേർഡ് മൊബൈലിൽ ലഭിക്കുന്ന ഒടിപി എന്ന അധിക സുരക്ഷാ സംവിധാനവുമുണ്ട്. അതേ സമയം ബാങ്കിന്റെയോ ജി-പേ തുടങ്ങിയ പേയ്മെന്റ് അഗ്രഗേറ്റർമാരുടെയോ ഔദ്യോഗിക മൊബൈൽ ആപ്പ് ഉപയോഗിച്ച് ഒരു മൊബൈൽ ഫോണിന്റെ സഹായത്തോടെ നടത്തുന്ന ബാങ്കിങ് സേവനങ്ങ ളാണ് മൊബൈൽ ബാങ്കിങ്. ഇന്റർനെറ്റ് ബാങ്കിങ്ങിലൂടെ ബാങ്കുശാഖ സന്ദർശിക്കാതെതന്നെ എല്ലാ ബാങ്കിങ് സേവനങ്ങളും നടത്താം. അതേ സമയം മൊബൈൽ ബാങ്കിങ്ങിൽ നിശ്ചിത ഇടപാടുകളേ നടത്താനാകൂ.