നല്ലൊരു ബർത്ത്ഡേ ഗിഫ്റ്റ്

മാസം 120 രൂപ വീതം കുട്ടിയുടെ 60 വയസ്സു വരെ നിക്ഷേപിച്ചാൽ മൊത്തം 22,67,007 രൂപ കിട്ടും. മാസം 8,483 രൂപ പെൻഷനും മാസം 500 രൂപ ഇട്ടാൽ കിട്ടുക 1.13 കോടി രൂപയും 42,413 രൂപ പെൻഷനും.

- കെ.കെ.ജയകുമാർ

ശനിയാഴ്ച ബന്ധുവിന്റെ മകന്റെ ആദ്യ ബർത്ഡേയാണ്. മറന്നിട്ട് വരരുത്, ഭാര്യയുടെ വാട്സാപ് മെസേജാണ്. സാധാരണ ഞാനിതെല്ലാം മറക്കും. പിന്നെ പോകുന്നവഴിക്ക് ഗിഫ്റ്റ് വാങ്ങേണ്ടിവരും. അതൊഴിവാക്കാനാണ് ഈ മെസേജ്. ഒകെ അടിച്ചപ്പോ വീണ്ടും മെസേജ്.

"അച്ഛാ ഇത്തവണ നല്ല കിടുക്കാച്ചി ഗിഫ്റ്റ് കൊടുക്കണം,' മകളാണ്. “എന്താണ് വേണ്ടത്, വസ്ത്രം, കളിപ്പാട്ടം, സ്വർണമോതിരം...?' “അയ്യേ, എല്ലാം ക്രിഞ്ച്. വേറെ എന്തെങ്കിലും?' മോളുടെ മെസേജ്

"എന്താണെന്നു കൃത്യമായി പറയൂ, അല്ലേൽ അച്ഛൻ എന്തെങ്കിലും ഏടാകൂടവുമായി വരും.

കല്യാണവീട്ടിൽ മരണവാറന്റുമായി പോയ മഹാനാണ്,' അമ്മയുടെ വക മാരക മെസേജ്.

"കല്യാണവീട്ടിൽ മരണവാറന്റോ, അതെന്താ അച്ഛാ?' "അതു മോളേ, വധുവരന്മാരുടെ പേരിൽ ഓരോ ടേം പോളിസി എടുത്തു ഗിഫ്റ്റായി കൊടുത്തതിന് കളിയാക്കുന്നതാ, ഞാൻ മറുപടി അയച്ചു.