വീടിന്റെ വില താങ്ങാനാകുന്നില്ലേ? 30% വിലക്കുറവിൽ സ്വന്തമാക്കാൻ അവസരം

സാധാരണക്കാരന് ഫ്ലാറ്റോ, വീടോ വാങ്ങുന്നത് ജീവിതകാലം മുഴുവൻ കനത്ത കടബാധ്യതയാണു സ്വഷ്ടിക്കുന്നത്. വീടുകൾ കുറച്ചെങ്കിലും വിലക്കുറവിൽ ലഭിച്ചാൽ പലർക്കും ഈ കടക്കെണി ഒഴിവാക്കാം.

- സുമ സണ്ണി

വീടുകളുടെ വില ഇന്ത്യയിലെ എല്ലാ നഗരങ്ങളിലും ഉയരുകയാണ്. ഫ്ലാറ്റുകൾ വിൽക്കാൻ സാധിച്ചില്ലെങ്കിലും, വില കുറച്ചു നൽകാൻ നിർമാതാക്കൾ തയാറാകുന്നുമില്ല. സാധാരണക്കാരനു മാത്രമല്ല, ഇടത്തരക്കാരനും ഫ്ലാറ്റോ, വീടോ വാങ്ങുന്നത് കനത്ത കടബാധ്യതയും വരുത്തുന്നുണ്ട്. അതുകൊണ്ടുതന്നെ വീടുകൾ കുറച്ചു വിലക്കുറവിൽ ലഭിച്ചിരുന്നെങ്കിലെന്ന് പലരും ചിന്തിക്കാറുണ്ട്. അതിനുള്ള ഒരു സൗകര്യം ബാങ്കുകളുടെ ലേലത്തിൽ ലഭിക്കാൻ സാധ്യതയുണ്ട്.

ബാങ്ക് ലേലങ്ങൾ

ഭവനവായ്പയെടുത്തിട്ട് തിരിച്ചടയ്ക്കാത്തവരുടെ വീടുകളും ഫ്ലാറ്റുകളും ബാങ്കുകൾ ജപ്തി ചെയ്യാറുണ്ട്. കടം വാങ്ങുന്നയാൾ വായ്പയിൽ വീഴ്ചവരുത്തിയാൽ കുടിശികത്തുക വീണ്ടെടുക്കാൻ ജപ്തിനടപടികൾ ആരംഭിക്കാൻ ബാങ്കിന് അവകാശമുണ്ട്. ഇത്തരം ജപ്തിയുടെ ഭാഗമായി, വസ്തു പൊതുലേലത്തിൽ വിൽക്കുമ്പോൾ താൽപര്യമുള്ളവർക്ക് ലേലം വിളിക്കാം. ലേലസമയത്ത് ഏറ്റവും കൂടുതൽ തുകയ്ക്ക് വിളിക്കുന്ന വ്യക്തിക്ക് വസ്തുവിന്റെ ഉടമസ്ഥാവകാശം ലഭിക്കും. എന്നാൽ ഇത്തരം പ്രോപ്പർട്ടി ലേലത്തിൽ വിൽക്കാൻ കഴിഞ്ഞില്ലെങ്കിൽ അതു ബാങ്കിന്റെ ഉടമസ്ഥതയിലുള്ള വസ്തുവായി മാറും. ബാങ്കിന്റെ റിയൽ എസ്റ്റേറ്റ് ഡിപ്പാർട്ട്മെന്റ് വഴിയോ, റിയൽ എസ്റ്റേറ്റ് ഏജന്റുവഴിയോ വിൽപനയ്ക്കായി ലിസ്റ്റ് ചെയ്യുകയും ചെയ്യും. ഇവിടെ കുറഞ്ഞ വിലയിൽ വീടുകളും ഫ്ലാറ്റുകളും ലഭിക്കാനുള്ള സാധ്യതയുണ്ട്.

ഗുണങ്ങൾ പലതുണ്ട്