മികച്ച നേട്ടം ഉറപ്പാക്കാൻ നിങ്ങൾ അറിയേണ്ടത്

പത്രത്തിൽ ഒരു നിക്ഷേപത്തട്ടിപ്പ് എങ്കിലും ഇല്ലാത്ത ദിവസം ഉണ്ടോ എന്തുകൊണ്ടാണിത്? 40-50-55 വയസ്സാകുമ്പോഴാണ് ഒന്നും സമ്പാദിച്ചിട്ടില്ല എന്നു തിരിച്ചറിയുന്നത്. ആ സമയത്താണ് തട്ടിപ്പിലൊക്കെ പെടുന്നത്. നേരത്തേ നിക്ഷേപിക്കാൻ തീരുമാനിച്ചാൽ ആർക്കും സാമ്പത്തിക സുരക്ഷ സുഗമമായി ഉണ്ടാക്കാം.

- 

50 ഓവറിന്റെ മാച്ചിൽ 40 ഓവർ വരെ മുട്ടി നിന്നിട്ട് അവസാന ഓവറിൽ അടിച്ചെടുക്കാൻ നോക്കുമ്പോൾ വിക്കറ്റ് പോവും. ക്രിക്കറ്റിൽ നാം കാണുന്ന ഈ കളിയാണ് താമസിച്ചു നിക്ഷേപം സ്റ്റാർട്ട് ചെയ്യുന്നവരുടെ കാര്യത്തിലും സംഭവിക്കുന്നത്. താമസിച്ചു തുടങ്ങുന്ന പലരും പെട്ടെന്നു പണമുണ്ടാക്കാൻ വലിയ റിസ്ക്കിൽ പോയി പെടും. വലിയ നഷ്ടം സംഭവിക്കുകയും ചെയ്യും.

കേരളത്തിൽ മ്യൂച്വൽ ഫണ്ടിനെക്കുറിച്ചുള്ള അറിവ് കുറവാണ്. ഇപ്പോഴും താൽപര്യം ഭൂമി, സ്വർണം തുടങ്ങിയ ആസ്തികളോടാണ്. പൈസ കിട്ടിയാൽ റിയൽ എസ്റ്റേറ്റോ സ്വർണമോ വാങ്ങും. അല്ലെങ്കിൽ ഫിനാൻഷ്യൽ അസെറ്റ് എന്നു പറഞ്ഞ് എഫ്ഡിയിലും ലൈഫ് പോളിസിയിലും നിക്ഷേപിക്കും. ഒരുപാടു പേർ മ്യൂച്വൽ ഫണ്ട് എന്നു തെറ്റിദ്ധരിച്ച് മറ്റു പലതിലും നിക്ഷേപിക്കുന്നുണ്ട്. സാധാരണക്കാർ മാത്രമല്ല, എൻജിനീയർമാരായ സുഹൃത്തുക്കളൊക്കെ മ്യൂച്വൽ ഫണ്ടാണെന്നു പറഞ്ഞു കാണിക്കുന്നവയിൽ യൂലിപ്പും ട്രഡീഷനൽ പോളിസികളുമുണ്ടാകും.

ജോലി കിട്ടിയാലുടൻ തുടങ്ങുക

 പലരും നിക്ഷേപം നേരത്തേ പ്ലാൻ ചെയ്യില്ല. ജോലി കിട്ടിക്കഴിയുമ്പോൾ ഇരുപതിന്റെ ആദ്യ പകുതിയിൽ പ്ലാൻ ചെയ്ത് തുടങ്ങുകയാണ് നല്ലത്. 500-1000 രൂപയിൽ പോലും തുടങ്ങാം. വരുമാനം കൂടുന്നതിന് അനുസരിച്ച് തുക വർധിപ്പിക്കാം. 20-25 വർഷത്തിനുള്ളിൽ സാമ്പത്തിക സ്വാതന്ത്ര്യം കിട്ടും. പിന്നെ പൈസയ്ക്കു വേണ്ടി ജോലി ചെയ്യണ്ട. ഇഷ്ടമുള്ള ജോലിയാണെങ്കിൽ തുടരാം. പാഷൻ ഫോളോ ചെയ്യാം. റിട്ടയർമെന്റിനെക്കുറിച്ച് ആലോചിച്ചു ടെൻഷൻ അടിക്കേണ്ട. പറയാൻ എളുപ്പമാണ്. പക്ഷേ, ഇരുപതുകളിൽ ഇക്കാര്യം ഞാൻ ആലോചിച്ചിട്ടില്ല. ആരും ആലോചിക്കില്ല. ഈ ഫീൽഡിൽ ഉണ്ടായിട്ടുപോലും ഞാൻ നിക്ഷേപിച്ചു തുടങ്ങിയതു വളരെ താമസിച്ചാണ്.

കടക്കെണി വരുന്നത്

പണത്തിന് അത്യാവശ്യം വരുമ്പോൾ 35-40 ശതമാനത്തിനും മറ്റും കടമെടുക്കുകയോ ക്രെഡിറ്റ് കാർഡ് വായ്പയെ ആശ്രയിക്കുകയോ ചെയ്യും. അത് പിന്നെ തിരിച്ചടക്കാൻ പറ്റാതെ വരും. യുവാക്കളുടെ ഇടയിൽ നിക്ഷേപശീലം നേരത്തെ തുടങ്ങാൻ പറ്റുമെങ്കിൽ ഭാവി ശക്തമാക്കാം. ചുറ്റുമുള്ള എല്ലാവരും ചെയ്യുമ്പോൾ നമുക്കും സ്വാഭാവികമായി ചെയ്യാൻ തോന്നും. പക്ഷേ, കേരളത്തിൽ ഈ ബോധവൽക്കരണം കൂടുതൽ ആവശ്യമുണ്ട്.

മികച്ച അഡ്വൈസറെ എവിടെ കിട്ടും?