വിൽപത്രം വഴി ഉറപ്പാക്കാം നിങ്ങളുടെയും മക്കളുടെയും സന്തോഷം

പണച്ചെലവില്ലാതെ സ്വന്തം സ്വത്തുവകളെല്ലാം ഇഷ്ടപ്പെട്ട രീതിയിൽ കൈമാറാനും ആവശ്യം വന്നാൽ തിരിച്ചെടുക്കാനും വിൽപത്രം വഴി സാധിക്കും.

- അഡ്വ. ജയരാജ് എ.പയസ്

വാർധക്യകാലത്ത് വാത്സല്യത്തോടെ മക്കൾ സ്നേഹ സംരക്ഷിച്ചു കൊള്ളുമെന്ന വിശ്വാസത്താൽ മാതാപിതാക്കൾ മുഴുവൻ സ്വത്തുക്കളും അവർക്ക് എഴുതി കൊടുക്കും. ഇപ്രകാരം സ്വത്തുക്കൾ ലഭിച്ച മക്കൾ മാതാപിതാക്കളെ സംരക്ഷിക്കാതിരിക്കുകയും അവഗണിക്കുകയും ചെയ്യുന്നത് ഇപ്പോൾ സാധാരണ സംഭവമായിരിക്കുന്നു.

ഇത്തരം സാഹചര്യത്തിൽ നിയമപ്രകാരം മക്കൾക്കു കൈമാറ്റം ചെയ്ത സ്വത്തുക്കൾ തിരികെ വേണമെന്നു തോന്നിയാൽ? അതിനു നിയമപരമായ ധാരാളം കടമ്പകൾ കടക്കേണ്ടിവരും. ഇഷ്ടദാനം വഴിയോ ധനനിശ്ചയ ഉടമ്പടി വഴിയോ മക്കൾക്കു കൈമാറ്റം ചെയ്ത വസ്തുക്കൾ റദ്ദു ചെയ്തു തിരികെ വാങ്ങാൻ മുതിർന്ന പൗരസംരക്ഷണ നിയമപ്രകാരം സാധിക്കും. പക്ഷേ, നിയമത്തിന്റെ നൂലാമാലകൾ അത് എളുപ്പമല്ലാതാക്കുന്നു. വിൽപത്രത്തിന്റെ സാധ്യതകൾ ആലോചിക്കേണ്ടതും ഉപയോഗപ്പെടുത്തേണ്ടതും ഇവിടെയാണ്.

എപ്പോൾ വേണമെങ്കിലും റദ്ദാക്കാം

എഴുതിയ ഒരു വിൽപത്രം എപ്പോൾ വേണമെങ്കിലും റദ്ദു ചെയ്യാം. എത്ര തവണ വേണമെങ്കിലും മാറ്റി എഴുതാം. റജിസ്ട്രേഷൻ ആവശ്യമില്ലാത്തതുകൊണ്ട് ഒരിക്കൽ എഴുതിയ വിൽപത്രം, സാഹചര്യം മാറിയാൽ ഒരാൾക്ക് എളുപ്പത്തിൽ മാറ്റിയെഴുതാം എന്നു ചുരുക്കം.