മുരിങ്ങയില കൊണ്ടൊരു സംരംഭം ലാഭം 30%

മുരിങ്ങയില ഉപയോഗിച്ചുള്ള ആരോഗ്യഭക്ഷണങ്ങൾ ഉൽപാദിപ്പിച്ച് ഇന്ത്യയ്ക്കകത്തും പുറത്തും വിപണി കണ്ടെത്തി വിജയം നേടിയ അംബിക സോമസുന്ദരൻ എന്ന വിട്ടമ്മയെയും സംരംഭത്തെയും പരിചയപ്പെടാം.

- ടി. എസ്. ചന്ദ്രൻ മുൻ ഡപ്യൂട്ടി ഡയറക്ടർ, സംസ്ഥാന വ്യവസായ വാണിജ്യ വകുപ്പ്

മുരിങ്ങയിലയുടെ ഔഷധഗുണങ്ങൾ എല്ലാവർക്കും നന്നായി അറിയാം. എന്നാൽ, മുരിങ്ങയില തരുന്ന ബിസിനസ് അവസരങ്ങളെക്കുറിച്ച് അധികമാർക്കും അറിയില്ല. അതു മനസ്സിലാക്കി വിദേശവിപണിയിൽ ഉൾപ്പെടെ നന്നായി വിറ്റഴിക്കാൻ കഴിയുന്ന, മുരിങ്ങയില ഉപയോഗിച്ചുള്ള ഒട്ടേറെ ഉൽപന്നങ്ങളാണ് തൃശൂർ മരോട്ടിച്ചാലിലുള്ള കാര്യാട്ട് ഡ്രൈ ഫ്രൂട്സ് എന്ന സ്ഥാപനം വിപണിയിലെത്തിക്കുന്നത്.

 എന്താണ് ബിസിനസ്?

മുരിങ്ങയില മുഖ്യ അസംസ്കൃത വസ്തുവായ ഒട്ടേറെ ഉൽപന്നങ്ങൾ ഇവിടെ നിർമിക്കുന്നു. മുരിങ്ങയില ഉണക്കിയത്, മുരിങ്ങയില പൗഡർ, ക്യാൾ, മുരിങ്ങയില രസം പൊടി, സൂപ്പ് പൊടി, പായസം മിക്സ്, രസം മിക്സ്, മുരിങ്ങയില പുട്ടുപൊടി, അപ്പപ്പൊടി തുടങ്ങി ഒരു ഡസനിലേറെ ഉൽപന്നങ്ങളാണ് മുരിങ്ങയില ആധാരമാക്കി തയാറാക്കി വിൽക്കുന്നത്. കൂടാതെ മുളപ്പിച്ച ധ്യാനങ്ങളുടെ പൗഡർ മുരിങ്ങയില പൊടിയുമായി മിക്സ് ചെയ്ത് മില്ലറ്റ് മിക്സുകളും വിൽക്കുന്നു.

പ്രവർത്തനരീതി

കർഷകരിൽ നിന്നു സ്ഥിരം സംവിധാനത്തിലൂടെ മുരിങ്ങയില കിലോഗ്രാമിന് 30 രൂപ നിരക്കിൽ ശേഖരിക്കുകയാണ് ആദ്യപടി. എന്നിട്ടു കമ്പുകളിൽ നിന്നു ഇല മാത്രം കൈകൊണ്ടു വേർതിരിച്ചെടുക്കും. അതുകഴിഞ്ഞ് നന്നായി കഴുകി ഡ്രയറിൽ നിരത്തി ഉണക്കാം. ഇങ്ങനെ ഒരു ബാച്ച് ഉണങ്ങിയെടുക്കാൻ ഏകദേശം ഒന്നര ദിവസം വേണ്ടിവരും. ഡ്രയർ കൂടാതെ പോളിഹൗസ് സംവിധാനം വഴിയും ഉണക്കിയെടുക്കാറുണ്ട്. ഇലയുടെ നിറം കൃത്യമായി ലഭിക്കുന്നതിനു ഡ്രയറും ആന്റി ഓക്സിഡന്റ് കൂടുതൽ ലഭിക്കുന്നതിനു പോളി ഹൗസുമാണ് നല്ലതെന്നു പറയാം. ഇത്രയും പ്രക്രിയ പൂർത്തിയായാൽ ഉണങ്ങിയ ഇല അതേ രീതിയിലോ ആവശ്യമെങ്കിൽ പൊടിച്ചോ പാക്ക് ചെയ്യുന്നു. പിന്നീട് ഇവ തനിച്ചും മറ്റു ധാന്യങ്ങളുമായി മിക്സ് ചെയ്തു പാക്ക് ചെയ്ത് വിപണിയിൽ ഇറക്കും.