വളരണം പണി ചെയ്ത് പടിപടിയായി

പഠനത്തോടൊപ്പം ജോലിയോ ബിസിനസോ ഒക്കെ ചെയ്തു വളരാൻ വേറെ പറമ്പ് അന്വേഷിച്ചു നടക്കേണ്ടതില്ല, ഈ മണ്ണിൽ തന്നെ അതിനു സ്ഥലമുണ്ട്.

- പി. കിഷോർ

കോളജിൽ പഠിക്കുമ്പോൾ പയ്യൻ കുഞ്ഞമ്മയുടെ കയ്യിൽനിന്ന് 5,000 രൂപ കടം വാങ്ങി ചെറിയൊരു സ്കൂട്ടർ വർക്ഷോപ്പിട്ടു. സ്കൂട്ടറുകളുടെ റിപ്പയറും സർവീസും ബോഡി വാഷുമൊക്കെ ചെയ്യും. എഴുപതുകളിൽ സ്കൂട്ടർ എന്നാൽ ബജാജ് ആയിരുന്നല്ലോ. അങ്ങനെ അതൊരു ബജാജ് സർവീസ് സെന്ററായി. ബജാജ് കമ്പനിയുടെ അംഗീകാരവും കിട്ടി.

പയ്യന് ബജാജ് സ്കൂട്ടറിന്റെ ഡീലർഷിപ് കിട്ടുന്നതാണു പിന്നെ കണ്ടത്. എൻആർഐ കോട്ടയിൽ വേഗം സ്കൂട്ടർ കിട്ടുന്ന പദ്ധതിയും അക്കാലത്തുണ്ടായിരുന്നു. ബജാജ് സർവീസ് സെന്ററുകൾ പലതായി വളർന്നു. സ്കൂട്ടർ നിന്നപ്പോൾ ബജാജ് ബൈക്ക് ഷോറൂമായി. പിന്നെ കാർ കമ്പനികളുടെ ഡീലർഷിപ്പിലേക്കു വളരുന്നതാണു കണ്ടത്.