മീൻകുളത്തിനരികെ ഉല്ലാസക്കൊട്ടാരം

മത്സ്യക്കുളത്തിനരികിൽ ഫാം സ്റ്റേ

- ജയിംസ് ജേക്കബ് തുരുത്തുമാലി

പാടവും പറമ്പും തറവാടുമൊക്കെ ആളൊഴിഞ്ഞ് അനാഥമാകുന്ന കേരളത്തിൽ അവയുടെ പുത്തൻ സാധ്യതകൾ പ്രയോജനപ്പെടുത്തുകയാണ് കോട്ടയം അയ്മനം പഞ്ചായത്തിലെ പുലിക്കുട്ടിശേരിയിൽ കണ്ടമുണ്ടാകരി ജോർജ് ജോൺ എന്ന ജോണി മൂസ്. സംസ്ഥാന ഫിഷറീസ് വകുപ്പിന്റെ മികച്ച മത്സ്യക്കർഷകനുള്ള 2013 ലെ അവാർഡ് നേടിയ ജോണി മത്സ്യക്കൃഷി ചെയ്യുന്നത് വീടിനോടു ചേർന്നുള്ള പാടത്ത്. അവിടെ അഞ്ചേക്കറിലേറെ വിസ്തൃതിയിൽ ഒരുക്കിയ കുളത്തിൽ വർഷം തോറും നടത്തി വന്നിരുന്ന വിളവെടുപ്പ് ക്രമേണ ഒരു ജനകീയ ആഘോഷമായി നാട്ടുകാർ ഏറ്റെടുത്തപ്പോഴാണ് കൃഷിയാനന്ദത്തിന്റെ വിപണനമൂല്യം അദ്ദേഹം തിരിച്ചറിഞ്ഞത്. വിളവെടുപ്പുവേളയിൽ മാത്രമല്ല, അല്ലാത്തപ്പോഴും മീൻകുളത്തിനടുത്ത് ഒത്തുകൂടാനും ചൂണ്ടിയിടാനും മത്സ്യവിഭവങ്ങൾ തയാക്കാനുമൊക്കെ താൽപര്യമുള്ളവർക്ക് അതിന് അവസരവും സൗകര്യവും ചെയ്തു തുടങ്ങിയത് അങ്ങനെ. ക്രമേണ തൊട്ടടുത്ത് കുമരകം വിനോദസഞ്ചാരകേന്ദ്രത്തിൽ എത്തുന്ന ടൂറിസ്റ്റുകളും ജോർജിന്റെ "ജോണി മൂസ് ബാക്ക് വാട്ടർ ഫാമി'ലേക്കു വന്നതോടെ ഇതൊരു ഫാം ടൂറിസം സംരംഭമായി വിപുലമാക്കുകയായിരുന്നു.