ആദായക്കൃഷി തനിനാടൻ

നാടൻ നെൽവിത്തു സംരക്ഷണവും കൃഷിയും ആദായ സംരംഭമാക്കുന്ന വയനാടൻ കർഷകൻ

- 

നാടൻ വിത്തുകൾ സംരക്ഷിക്കുന്നവർ ഏറെയുണ്ട്. നാട്ടിൽ. എന്നാൽ, സേവനമെന്നതിലപ്പുറം സുസ്ഥിര സാമ്പത്തികനേട്ടം അന്യമായതിനാൽ ഇത്തരം പ്രവർത്തനങ്ങൾക്ക് അകാലമൃത്യു സ്വാഭാവികം. എന്നാൽ, നൂറിലേറെ നെല്ലിനങ്ങൾ രാജ്യത്തിന്റെ പല ഭാഗങ്ങളിൽ നിന്നു ശേഖരിച്ചു സംരക്ഷിക്കുകയും അവ കൃഷി ചെയ്തു ണ്ടാക്കുന്ന വിത്തും അരിയും വിറ്റ് ലക്ഷങ്ങൾ നേടുകയും ചെയ്യുകയാണ് വയനാട് നെന്മേനി മാത്തൂർകുളങ്ങര സുനിൽ കുമാർ. വിത്തുസംരക്ഷണത്തെ ഒരു സംരംഭമാക്കിയും ജൈവ സാക്ഷ്യപത്രമുള്ള കൃഷിയിലൂടെയും മികച്ച വരുമാനം നേടുന്ന സുനിൽ, നെല്ല് കൂടാതെ പച്ചക്കറികൾ, ചെറുധാന്യങ്ങൾ, കാപ്പി, കുരുമുളക്, അടയ്ക്ക് മുതൽ സൂര്യകാന്തിയും ചിയയും വരെ കൃഷി ചെയ്തു വിളവ വിധ്യത്തിന്റെ വിസ്മയവുമൊരുക്കുന്നു.

കൃഷി തന്നെ ജീവിതം

 പാലക്കാടുനിന്ന് മാത്തൂർകുളങ്ങര കുടുംബം വയനാട്ടിലെ ത്തിയതിനു പിന്നിൽ ഒരു കഥയുണ്ട്. രണ്ടാം ലോക മഹാ യുദ്ധകാലത്തെ പട്ടാള സേവനത്തിനു പ്രത്യുപകാരമായി സുനിലിന്റെ മുത്തച്ഛൻ ശങ്കരനു പതിച്ചുകിട്ടിയതാണ് നെന്മേനിയിലെ ഈ കൃഷിയിടം. അച്ഛൻ വേലായുധന്റെ മരണശേഷം സുനിൽ തന്റെ സഹോദരങ്ങളായ സുരേന്ദ്രൻ, അനിൽ, ഉമേഷ് എന്നിവരുമായി ചേർന്നു കൃഷി തുടരുന്നു. കൂട്ടുകുടുംബത്തിൽ കൃഷിയുടെ മുഖ്യ ചുമതലക്കാരൻ സുനിലാണ്. എന്നാൽ, ജ്യേഷ്ഠനും അനുജന്മാരും അമ്മയും ഭാര്യയും മകളും ഏടത്തിയമ്മയുമൊക്കെ സുനിലിനു സർവപിന്തുണയുമായി കൂടെയുണ്ട്. കുടുംബാംഗങ്ങളുടെ കൂട്ടായ പരിശ്രമത്തിന്റെ ഫലമാണ് ഇവിടെ ഓരോ വിളയുടെയും വളർച്ചയും വിളവും. നാടൻ വിത്തിനങ്ങളോടുള്ള ഇഷ്ടം മൂലം ഹോബിപോലെ അവ ശേഖരിച്ചു തുടങ്ങിയ സഹോദരങ്ങൾക്ക് പിന്നീടതു ജീവിതം തന്നെയായി.