ടിക്കറ്റ് വച്ച് പ്രസംഗം

കഥക്കൂട്ട്

- തോമസ് ജേക്കബ്

അറിഞ്ഞിടത്തോളം ഒരു പ്രസംഗക്കമ്പക്കാരനാണ് കെ.പി.മോഹനൻ. ജയ്ഹിന്ദ് ടിവിയുടെ സാരഥിയായിരുന്ന മോഹനൻ കുവൈറ്റിലെ പത്ര പ്രവർത്തന ചരിത്രത്തിനും നാട്ടിലെ ടിവി പ്രസ്ഥാനങ്ങൾക്കും മുൻപ് കഴിഞ്ഞ നൂറ്റാണ്ടിന്റെ അറുപതുകളിൽ കണ്ണൂരിൽ ഒരു വിദ്യാർഥി നേതാവു മാത്രമായിരുന്ന കാലത്ത് കോഴിക്കോടു ടൗൺ ഹാളിൽ ടിക്കറ്റ് വച്ച് ഒരു പ്രസംഗം ചെയ്തു.

"ടൗൺ ഹാളിൽ ടിക്കറ്റ് വച്ചു പ്രസംഗം. സുപ്രസിദ്ധ വാഗ്മി കെ.പി. മോഹനൻ പ്രസംഗിക്കുന്നു' എന്ന് പോസ്റ്റർ പതിച്ചു. കോഴിക്കോട്ട് അന്ന് അത്രയധികമാളുക ൾക്ക് മോഹനനെ അറിയില്ല. അതുകൊണ്ട് കൗതുകത്തിനു വേണ്ടി ടിക്കറ്റെടുത്ത് ആളുകൾ കയറി.

സാഹിത്യപരിഷത്ത് സമ്മേളനം ടിക്കറ്റ് വച്ച് നടത്തിയിട്ടുണ്ട്. ടിക്കറ്റില്ലാത്തതിനാൽ വയലാർ രാമവർമയെ കടത്തിവിടാതിരുന്നതും ആ സംഭവം മാറ്റൊലിക്കവി പിറക്കാൻ ഇടയാക്കിയതും പ്രഫ.എസ്. കെ.വസന്തൻ കേരള സംസ്കാര നിഘണ്ടുവിൽ പറഞ്ഞിട്ടുണ്ട്.

ആലുവ യുസി കോളജിൽ ഒരു രൂപ ടികറ്റ് വച്ച് കവിയരങ്ങു നടത്തിയിട്ടുണ്ടെന്ന് അടുത്ത കാലത്തു നിര്യാതനായ പത്രപ്രവർത്തകനും കവിയുമായ എം.പി. സതീശൻ എഴുതിയിട്ടുണ്ട്.