ஹாலிவுட்டில் சண்டைக் கலை!

அண்மையில் வெளிவந்திருக்கும் Mission Impossible - Dead Reckoning -part1 படத்தில் டாம் க்ரூஸ் அவரது ஸ்டண்ட் காட்சிகளில் அவரே நடித்திருக்கும் வீடியோக்கள் உலகெங்கும் பரவின. இந்தப் படம் மட்டும் அல்லாமல் பொதுவாகவே டாம் க்ரூஸ் அவரது படங்களில் ஆபத்தான பல ஸ்டண்ட் காட்சிகளை அவரே செய்யும் தன்மை உடையவர். இருந்தாலும் அவருக்கும் ஸ்டண்ட்களில் டூப்கள் உண்டு. அதை அவரே சொல்லியும் இருக்கிறார் (தமிழில் கமல்ஹாஸனும் அவரது ஸ்டண்ட்களில் பலவற்றை அவரே செய்யக்கூடியவர்).

- கருந்தேள் ராஜேஷ்

ஸ்டண்ட் டபிள்கள் என்று பொதுவாக அழைக்கப்படும் ஸ்டண்ட்மேன்களின் பிரதான வேலை, நடிக நடிகையர்களுக்கு டூப் போடுவது. ஆபத்தான ஸ்டண்ட் காட்சிகளில் அவர்களுக்குப் பதில் இவர்கள் நடித்து அந்த ஸ்டண்ட் காட்சியை நல்லபடியாக முடித்துக் கொடுப்பது. உலகின் மிக ஆபத்தான வேலைகளில் இதுவும் ஒன்று என்பது அனைவருக்கும் தெரியும். ஒரு சிறிய நொடி பிசகினாலும் எலும்புகள் உடையலாம்; உயிருக்கு ஆபத்து நேரலாம் என்ற சூழலில் இந்த வேலைக்குத் தயங்காமல் வருவது உண்மையில் மிகப்பெரிய விஷயம். உலகெங்கும் இப்படிப் பல ஸ்டண்ட் டபிள்கள் இருந்திருக்கிறார்கள் இன்னும் இருக்கிறார்கள். தமிழ் சினிமாவிலும் அப்படிப் பலர் உண்டு.