പ്രചോദനത്തിന്റെ ഇഗാരവം

വിമ്പിൾഡൻ ടെന്നിസ് ചാംപ്യൻഷിപ്പിൽ പ്രഥമ കിരീടം നേടിയ ഇഗ സ്യം തെക്കിന്റെ പടയോട്ടത്തിന്റെ വിശേഷതകളേറെ

- 

പ്രചോദനത്തിന്റെ പൂക്കാലം കൂടി വാരിവിതറിയാണ് പോളണ്ടിൽ നിന്നുള്ള യുവതാരം ഇഗ സ്യംതെക് ഇത്തവണത്തെ വിമ്പിൾഡൻ ടെന്നിസ് ചാംപ്യൻഷിപ്പിന്റെ വനിതാ കിരീടം ഏറ്റു വാങ്ങുന്നത്. വിമ്പിൾഡൻ ടൂർണമെന്റിനെത്തുമ്പോൾ ഇത്തവണത്തെ കിരീടം താൻ ഉയർത്തുമെന്ന് ഇഗ പോലും കണക്കുകൂട്ടിയിരിക്കില്ല. കളിക്കളത്തിനുള്ളിലെ വെല്ലുവിളികളെക്കാൾ അതിനു പുറത്തുള്ള ചില സംഭവങ്ങളുടെ സമ്മർദങ്ങളായിരുന്നു ഇഗയ്ക്കു മുന്നിലുയർന്ന വെല്ലുവിളികൾ. വ്യക്തിജീവിതത്തിലും കരിയറിലും കഴിഞ്ഞ ഒരു വർഷമായി തിരിച്ചടികളുടെ പാതയിലൂടെയായിരുന്നു താരത്തിന്റെ സഞ്ചാരം. ഉത്തേജക മരുന്ന് ഉപയോഗിച്ചെന്ന ആരോപണവും റാങ്കിങ്ങിലെ വീഴ്ചയും ട്രോഫിയില്ലായ്മയും കരിയറിനെ പിടിച്ചുലച്ചപ്പോൾ മുത്തച്ഛന്റെ മരണം മാനസികമായി തകർത്തു. സമ്മർദങ്ങളുടെ നടുവിൽ നിന്നു വിമ്പിൾഡനിൽ ഒരു കിരീടജയം ആരാധകരും വിമർശകരും ഒരുപോലെ എഴുതിത്തള്ളിയിടത്താണ് ഇഗയുടെ മിന്നും പ്രകടനം.