WORLD CLASS

മാസ് ലുക്കും പ്രീമിയം ഇന്റീരിയറും ലക്ഷ്വറി ഫീച്ചേഴ്സുമായി എക്സ്ഇവി 9ഇ

- നോബിൾ എം. മാത്യു

ലോകോത്തരം എക്സ്ഇവി 9ഇയെ ഒറ്റവാക്കിൽ ഇങ്ങനെ വിശേഷിപ്പിക്കാം. എക്സ്ഇവി എന്നാൽ മഹീന്ദ്രയുടെ ഇലക്ട്രിക് എസ്യുവി എന്നാണുത്തരം. എക്സ്യുവി 700യുടെ ഇലക്ട്രിക് വകഭേദമല്ല ഇത്. എക്സ്-ഇവി 9ഇ പൂർണമായും ഇലക്ട്രിക് ആയി ജനിച്ച എസ്യുവിയാണ്.

ബിഇ6 ഡ്രൈവ് ചെയ്തതിനു ശേഷമാണ് എക്സ് ഇവിയിലേക്കു കയറുന്നത്. വലുപ്പം കൊണ്ടും ഡിസൈൻ കൊണ്ടും യാത്രാസുഖംകൊണ്ടും പെർഫോമൻസു കൊണ്ടുമെല്ലാം വീണ്ടും ഞെട്ടിച്ചുകളഞ്ഞു മഹീന്ദ്ര. മഹീന്ദ്രയുടെ ഇലക്ട്രിക് വാഹനങ്ങൾ ആരെങ്കിലും വാങ്ങുമോ, വേറെ കമ്പനികളുടെ നല്ല മോഡലുകൾ ഇല്ലേ എന്നു ചോദിച്ചവർക്കുള്ള ഉത്തരമാണ് എക്സ് ഇവി 9ഇ,

മാസ് ലുക്ക്

വലിയ ഇലക്ട്രിക് എവിയാണ് 9ഇ. 4789 എംഎം നീളവും 1907 എംഎം വീതിയും 1694 എംഎം ഉയരവുമുണ്ട്. എക്സ്യുവി 700യെക്കാളും നീളവും വീതിയുണ്ട് 9ഇയ്ക്ക്.

ബോണറ്റിലൂടെ പടർന്നു വശങ്ങളിലൂടെ താഴേക്കിറങ്ങി നിൽക്കുന്ന എൽഇഡി ഡേ ടൈം റണ്ണിങ് ലാംപാണ് മുന്നിൽ നിന്നുള്ള കാഴ്ചയിൽ ആദ്യം ശ്രദ്ധിക്കുക. ക്ലോസ്ഡ് ആയിട്ടുള്ള ഗിൽ. മസ്കുലർ ലൈനുള്ള ബോണറ്റിൽ മഹീന്ദ്രയുടെ പുതിയ ഇൻഫിനിറ്റി ലോഗോ നൽകിയിരിക്കുന്നു. 20 ഇഞ്ച് വീലുകളും വലിയ വീൽ ആർച്ചും ബൂട്ടിലേക്ക് ഒഴുകിയിറങ്ങുന്ന റൂഫ് ലൈനും കാണാൻ അതിമനോഹരം. ഗ്ലോസി ഫിനിഷാണ് വീൽ ആർച്ചുകൾക്ക്. വശക്കാഴ്ചയിലാണ് നീളം മനസ്സിലാകുക. എക്സ്യുവി 700യെക്കാളും 25 എംഎം വീൽബേസ്കൂടുതലുണ്ട് 9 ഇയ്ക്ക്. ഫ്ലഷ് ടൈപ് ഡോർ ഹാൻഡിലാണ്. സി പില്ലറിലാണ് പിൻഡോർ ഹാൻഡിൽ നൽകിയിരിക്കുന്നത്. മാസ് ലുക്കാണ് പിൻവശത്തിന്.

ക്ലാസ് ഇന്റീരിയർ

90 ഡിഗ്രി തുറക്കാവുന്ന ഡോറുകളാണ്. അകത്തേക്ക് ആയാസപ്പെടാതെ കയറാം. ലൈറ്റ് കളർ തീമിലുള്ള ഇന്റീരിയർ ലക്ഷ്വറി കാറുകളോടു കിടപിടിക്കും.