ક્યારે હટાવીશું અવકાશી કાટમાળ..

પાછલાં ૪૦-૫૦ વર્ષમાં અવકાશમાં અઢળક ઉપગ્રહો તરતા મૂકવામાં આવ્યા. આ ઉપગ્રહોનું આયુષ્ય સામાન્ય રીતે ૧૨થી ૧૫ વર્ષ જેટલું હોય. એ પછી આ ઉપગ્રહોનું શું કરવું એનો સચોટ જવાબ કોઈ પાસે નથી. આવા નકામા ઉપગ્રહો હવે એકબીજા સાથે ટકરાઈને કાટમાળમાં ફેરવાઈ રહ્યા છે. આવો કાટમાળ અન્ય કાર્યરત સેટેલાઈટ્સ માટે તો જોખમી છે જ, પણ એના અવશેષો પૃથ્વી પર ખાબકીને પણ પારાવાર નુકસાન કરવા સક્ષમ છે.

- સમીર પાલેજા (મુંબઈ) નિતુલ ગજ્જર (વડોદરા)

એ ગામમાં લગ્ન નહોતાં તોય આતશબાજી થઈ, વીજળીના ગોળા ચમક્યા ને છેવટે ૪૦ કિલો વજનની મોટી રિંગ એક ઠેકાણે ખાબકી. સદ્ભાગ્યે કોઈને ઈજા ન થઈ.

બે સપ્તાહ પહેલાં મહારાષ્ટ્રના ચંદ્રપુર જિલ્લાના લાડબોરી ગામે બનેલી આ ઘટનાનો ખુલાસો એવો થયો કે ઓચિંતા ખાબકેલી એ રિંગ ચીનના ચાંગ જંગ થ્રી-બી નામના સેટેલાઈટ સાથે જોડાયેલા રોકેટનો એક ભાગ હતી.