എങ്ങനെ നേടാം ഉറപ്പുള്ള സമ്പാദ്യം

വിപണിയിലെ തകർച്ച, സ്വർണവിലയിലെ മാറ്റങ്ങൾ ഇതൊന്നും ബാധിക്കാതെ ഉറപ്പുള്ള സമ്പാദ്യം നേടാൻ സഹായിക്കുന്ന സ്റ്റോയിക് ഫിനാൻസ് തന്ത്രങ്ങൾ

- പി. അനിൽകുമാർ ഡെപ്യൂട്ടി സെക്രട്ടറി, ധനകാര്യ വകുപ്പ് സെക്രട്ടേറിയറ്റ്, തിരുവനന്തപുരം

കേരളത്തിലെ ശരാശരി നിക്ഷേപകനെ സംബന്ധിച്ചിടത്തോളം സമ്പാദ്യം എന്നതു കേവലം അക്കങ്ങളല്ല, മറിച്ചു സ്വപ്നങ്ങളാണ്. വീട്, മക്കളുടെ വിദ്യാഭ്യാസം, വിവാഹം, സുരക്ഷിതമായ വിശ്രമജീവിതം തുടങ്ങിയ വലിയ സ്വപ്നങ്ങൾക്കുള്ള അടിത്തറയാണ് സമ്പാദ്യം. എന്നാൽ, വിപണിയിലെ പെട്ടെന്നുള്ള തകർച്ചകളും, സ്വർണവിലയിലെ അപ്രതീക്ഷിത മാറ്റങ്ങളും നമ്മെ പലപ്പോഴും സമ്മർദത്തിലാക്കും. ഇവിടെയാണ് 2000 വർഷങ്ങൾക്കു മുൻപ് ഗ്രീസിലും റോമിലും പ്രചരിച്ചിരുന്ന “സ്റ്റോയിസിസം' (Stoicism) എന്ന തത്വശാസ്ത്രത്തിന്റെ പ്രസക്തി.

വിപണിയിലെ ബഹളങ്ങളിൽ കുടുങ്ങാതെ എങ്ങനെ മികച്ച നിക്ഷേപകനായി വളരാം എന്നതു സ്റ്റോയിക് തത്വങ്ങളിലൂടെ നമുക്കു മനസ്സിലാക്കാം.

എന്താണ് സ്റ്റോയിസിസം?

സെനോ, എപിക്റ്റീസ്, സെനക്ക, മാർക്കസ് ഔറേലിയസ് തുടങ്ങിയ ചിന്തകർ വികസിപ്പിച്ചെടുത്ത ഈ തത്വം ലളിതമായ കാര്യമാണു പറയുന്നത്: "നിങ്ങൾക്ക് നിയന്ത്രിക്കാൻ കഴിയുന്ന കാര്യങ്ങളിൽ മാത്രം ശ്രദ്ധ കേന്ദ്രീകരിക്കുക, അല്ലാത്തവയെ ശാന്തമായി നേരിടുക.' ഈ ഒരു ചിന്താഗതി സാമ്പത്തിക ജീവിതത്തിൽ പ്രയോഗിച്ചാൽ നമുക്ക് അദ്ഭുതകരമായ മാറ്റങ്ങളുണ്ടാക്കാം.

നിയന്ത്രണത്തിന്റെ ദ്വിമുഖം (Dichotomy of Control): സ്റ്റോയിസിസത്തിലെ പ്രധാനപ്പെട്ട പാഠമാണിത്. നിങ്ങളുടെ സാമ്പത്തിക ജീവിതത്തെ രണ്ടായി തിരിക്കുക.

നിങ്ങളുടെ നിയന്ത്രണത്തിലുള്ളവ: നിങ്ങൾ എത്ര തുക നിക്ഷേപിക്കുന്നു, എത്ര കാലം നിക്ഷേപം തുടരുന്നു, നിങ്ങളുടെ അനാവശ്യ ചെലവുകൾ എങ്ങനെ കുറയ്ക്കുന്നു, വിപണിയിലെ വാർത്തകളോടുള്ള നിങ്ങളുടെ പ്രതികരണം.

നിങ്ങളുടെ നിയന്ത്രണത്തിലല്ലാത്തവ: ഹോർമുസ് കടലി ടുക്കിൽ നാളെ എന്തു സംഭവിക്കുമെന്നു പറയാൻ കഴിയില്ല. കാരണം, യുദ്ധം, രാജ്യാന്തരവിപണിയിലെ തകർച്ച, ബാങ്ക് പലിശയിലെ നിരക്കു മാറ്റം ഇതൊന്നും നമ്മുടെ നിയന്ത്രണത്തിലല്ല. വിപണി എപ്പോൾ ഉയരും എന്നു പ്രവചിക്കാൻ കഴിയില്ല. അതുകൊണ്ട് തന്നെ നമുക്കു നിയന്ത്രിക്കാൻ കഴിയാത്ത കാര്യങ്ങളെക്കുറിച്ച് ഓർത്തു വേവലാതിപ്പെടുന്നതു നിർത്തുക.

പകരം, വിപണി താഴേക്കു പോകുമ്പോൾ കൂടുതൽ യൂണിറ്റുകൾ വാങ്ങാൻ സഹായിക്കുന്ന SIP(Systematic Investment Plan) പോലുള്ള രീതികളിൽ ശ്രദ്ധ കേന്ദ്രീകരിക്കുക. അച്ചടക്കത്തോടെയുള്ള നിക്ഷേപം നിങ്ങളുടെ കൈകളിലാണ്.

സ്വർണമെന്ന സുരക്ഷാകവചം